ວັນທີ 11 ມີນານີ້ ໃນກອງປະຊຸມຂ່າວທີ່ຈັດຂຶ້ນຢູ່ສູນຖະແຫຼງຂ່າວຂອງກອງປະຊຸມຄັ້ງທີໜຶ່ງຂອງສະພາປະຊາຊົນແຫ່ງຊາດຈີນຊຸດທີ 13, ທ່ານຫວາງໂຊ້ເວີນ ຮອງລັດຖະມົນຕີກະຊວງການຄ້າຈີນ ທັງເປັນຮອງຜູ້ຕາງໜ້າການເຈລະຈາທາງການຄ້າສາກົນຂອງຈີນກ່າວວ່າ, ນັບມາຮອດປັດຈຸບັນ ຈີນໄດ້ເຊັນສັນຍາການຄ້າເສລີ 16 ສະບັບກັບ 24 ປະເທດຫຼືເຂດແຄວ້ນແລ້ວ ເຊິ່ງລວມມີສະມາຊິກອາຊຽນ, ມີປະເທດທີ່ລຽບຕາມຂອບໜຶ່ງແລວໜຶ່ງເສັ້ນທາງ, ແລະປະເທດອື່ນໆໃນໂລກ. ຢູ່ໃນຕາໜ່າງເຂດການຄ້າເສລີດັ່ງກ່າວມີທັງປະເທດທີ່ພັດທະນາແລ້ວແລະປະເທດທີ່ພວມພັດທະນາຈຳນວນໜຶ່ງ.
ທ່ານຫວາງໂຊ້ເວີນກ່າວເນັ້ນວ່າ, ການຂະຫຍາຍຕົວແຫ່ງການພົວພັນທາງການຄ້າການລົງທຶນລະຫວ່າງຈີນກັບປະເທດຄູ່ການຄ້າໃນເຂດການຄ້າເສລີແມ່ນໄວກວ່າປະເທດທີ່ບໍ່ແມ່ນຄູ່ການຄ້າເສລີ. ທ່ານໄດ້ຍົກຕົວຢ່າງມາຢືນຢັນວ່າ, ປີກາຍນີ້ ຍອດມູນຄ່າການຄ້າລະຫວ່າຈີນກັບອາຊຽນໄດ້ບັນລຸເຖິງ 500 ກວ່າຕື້ໂດລາສະຫະລັດ, ແມ່ນ 6 ເທົ່າຂອງຍອດມູນຄ່າການຄ້າໃນປີທີ່ປະຕິບັດສັນຍາການຄ້າເສລີຈີນ-ອາຊຽນ.
ທ່ານຫວາງໂຊ້ເວັນເຫັນວ່າ, ການເຈລະຈາກ່ຽວກັບສັນຍາທາງການຄ້າເສລີມີບົດບາດຊຸກຍູ້ການເຈລະຈາຫຼາຍຝ່າຍ. ການເຈລະຈາກ່ຽວກັບເຂດການຄ້າເສລີແລະການເຈລະຈາພາຍໃນຂອບອົງການການຄ້າໂລກ ຫຼື WTO ແມ່ນຊຸກຍູ້ເຊິ່ງກັນແລະກັນ ແລະຕ່າງຍູ້ໜູນກັນ.
 |
