ກອງປະຊຸມຄັ້ງທຳອິດຂອງສະພາປະຊາຊົນແຫ່ງຊາດຈີນຊຸດທີ 13 ໄດ້ຈັດກອງປະຊຸມຄົບຄະນະຄັ້ງທີ 4 ຢູ່ຫໍສະພາປະຊາຊົນແຫ່ງຊາດໃນຕອນເຊົ້າວັນທີ 13 ມີນານີ້ ໂດຍຮັບຟັງການແນະນຳຮ່າງກົດໝາຍວ່າດ້ວຍການກວດກາລັດຖະບານຈາກຄະນະປະຈຳສະພາປະຊາຊົນແຫ່ງຊາດ.
ໂດຍໄດ້ຮັບການມອບໝາຍຈາກຄະນະປະຈຳສະພາປະຊາຊົນແຫ່ງຊາດຊຸດທີ 12, ທ່ານຫຼີຈ້ຽນໂກວ໋ ຮອງປະທານຄະນະປະຈຳສະພາປະຊາຊົນແຫ່ງຊາດຊຸດທີ 12 ໄດ້ແນະນຳຮ່າງກົດໝາຍດັ່ງກ່າວ ໂດຍກ່າວວ່າ: ວຽກງານການສ້າງກົດໝາຍວ່າດ້ວຍການກວດກາລັດຖະບານ ໄດ້ເຄົາລົບແນວຄວາມນິດແລະຫຼັກການດັ່ງນີ້: ໜຶ່ງ, ຍຶດໝັ້ນທິດທາງການເມືອງທີ່ຖືກຕ້ອງ; ສອງ, ຍຶດໝັ້ນຮັກສາການເປັນເອກະພາບກັນກັບການປັບປຸງລັດຖະທຳມະນູນ; ສາມ, ຍຶດໝັ້ນທິດທາງແກ້ໄຂບັນຫາ ແລະ ສີ່, ຍຶດໝັ້ນການສ້າງກົດໝາຍຕາມຫຼັກວິທະຍາສາດ, ປະຊາທິປະໄຕ ແລະ ຕາມກົດໝາຍ.
ທ່ານຫຼີຈ້ຽນໂກວ໋ ກ່າວຕື່ມວ່າ: ຮ່າງກົດໝາຍວ່າດ້ວຍການກວດກາລັດຖະບານ ໄດ້ແບ່ງອອກເປັນ 9 ໝວດ ລວມທັງຫຼັກການທົ່ວໄປ, ອົງການກວດກາລັດຖະບານ ແລະໜ້າທີ່ຮັບຜິດຊອບ, ຂອບເຂດການກວດກາ, ອຳນາດການຄອບຄອງແລະກວດກາ, ລະບຽບການກວດກາ, ການຮ່ວມມືສາກົນຕ້ານການສໍ້ລາດບັງຫຼວງ, ການຕິດຕາມກວດກາອົງການແລະເຈົ້າໜ້າທີ່ກວດກາ, ຄວາມຮັບຜິດຊອບທາງດ້ານກົດໝາຍ ແລະ ອະນຸມາດຕາຜະໜວກທ້າຍ ລວມທັງໝົດມີ 69 ມາດຕາ ແລະກວມເອົາເນື້ອໃນ 7 ດ້ານ: ໜຶ່ງ, ກຳນົດແນວຄິດຊີ້ນຳ ແລະ ໂຄງປະກອບການນຳພາວຽກງານກວດກາຢ່າງຈະແຈ້ງ; ສອງ, ກຳນົດຫຼັກການແລະທິດທາງວຽກງານກວດກາຢ່າງຈະແຈ້ງ; ສາມ, ກຳນົດການຈັດຕັ້ງແລະຄວາມຮັບຜິດຊອບຂອງຄະນະກຳມະການກວດກາຢ່າງຈະແຈ້ງ; ສີ່, ການກວດກາຈະກວມເອົາພະນັກງານລັດທີ່ໃຊ້ສິດອຳນາດຂອງລັດນັ້ນທັງໝົດ; ຫ້າ, ມອບອຳນາດໃຫ້ອົງການກວດກາຕາມສົມຄວນ; ຫົກ, ປະຕິບັດຕາມລະບຽບການກວດກາຢ່າງເຂັ້ມງວດ ແລະ ເຈັດ, ເພີ່ມທະວີການຕິດຕາມກວດກາຕໍ່ອົງການແລະພະນັກງານກວດກາ.
