ວັນທີ 13 ມີນານີ້, ທ່ານຮວງຊີ່ລຽນ ເອກອັກຄະລັດຖະທູດຈີນປະຈຳອາຊຽນໄດ້ກ່າວປາຖະກະຖາໃນຫົວຂໍ້ "ຮ່ວມກັນສ້າງສາຍພົວພັນຈີນ-ອາຊຽນໃນຍຸກໃໝ່" ຢູ່ສູນຄົ້ນຄວ້າຍຸດທະສາດແລະບັນຫາສາກົນອິນໂດເນເຊຍທີ່ນະຄອນຫຼວງຈາກາຕາຕາມຄຳເຊີນ.
ໃນການປາຖະກະຖາ,ທ່ານຮວງຊີ່ລຽນຢືນຢັນວ່າ: ນະໂຍບາຍພື້ນຖານຂອງຈີນຕໍ່ອາຊຽນໃນຍຸກໃໝ່ສາມາດສະຫຼຸບເປັນຄຳວ່າ ໜຶ່ງບູລິມະສິດ, ສອງກວ່າເກົ່າແລະສາມສະໜັບສະໜູນ ຄືຈີນຈະກຳນົດເອົາອາຊຽນເປັນທິດທາງບູລິມະສິດໃນວຽກງານການຕ່າງປະເທດອ້ອມຂ້າງຄືທີ່ໄດ້ປະຕິບັດຜ່ານມາ; ສຸມໃສ່ຮ່ວມກັບອາຊຽນສ້າງສາຍພົວພັນຄູ່ຮ່ວມຍຸດທະສາດທີ່ມີລະດັບສູງກວ່າເກົ່າ, ສ້າງຄູ່ຮ່ວມຊາຕາກຳທີ່ແໜ້ນແຟ້ນກວ່າເກົ່າ; ເດັດດ່ຽວສະໜັບສະໜູນການສ້າງປະຊາຄົມອາຊຽນ, ສະໜັບສະໜູນອາຊຽນມີຖານະໃຈກາງໃນການຮ່ວມມືພາກພື້ນ, ສະໜັບສະໜູນອາຊຽນເສີມຂະຫຍາຍບົດບາດຫຼາຍກວ່າເກົ່າໃນວຽກງານສາກົນແລະພາກພື້ນ.
ທ່ານຮວງຊີ່ລຽນເນັ້ນວ່າ: ເນື່ອງໃນໂອກາດຈີນ-ອາຊຽນສະເຫຼີມສະຫຼອງການສ້າງຕັ້ງສາຍພົວພັນຄູ່ຮ່ວມຍຸດທະສາດຄົບຮອບ 15 ປີ, ການຮ່ວມມືລະຫວ່າງສອງຝ່າຍໄດ້ກາຍເປັນແບບຢ່າງທີ່ປະສົບຜົນສຳເລັດຫຼາຍທີ່ສຸດແລະມີຊີວິດຊີວາທີ່ສຸດໃນການຮ່ວມມືຂອງພາກພື້ນອາຊີປາຊີຟິກ. ການພົວພັນສອງຝ່າຍກຳລັງຂະຫຍາຍຕົວຈາກໄລຍະເຕີບໃຫຍ່ກ້າວເຂົ້າສູ່ໄລຍະສົມບູນຢ່າງວ່ອງໄວ, ໃນຕໍ່ໜ້າ ຈະມີໂອກາດພັດທະນາຫຼາຍກວ່າເກົ່າແລະມີຊ່ອງທາງການຮ່ວມມືກວ້າງຂວາງກວ່າເກົ່າ. ໃນຍຸກໃໝ່ແຫ່ງການຮ່ວມມືແບບຕ່າງຝ່າຍຕ່າງມີຜົນປະໂຫຍດ, ອາຊຽນຈະມີຄວາມສຳຄັນຕໍ່ຈີນເພີ່ມຂຶ້ນຢ່າງຕໍ່ເນື່ອງ ແລະຈີນກໍຈະສະໜັບສະໜູນອາຊຽນເພີ່ມຂຶ້ນຢ່າງຕໍ່ເນື່ອງເຊັ່ນກັນ, ການພົວພັນຈີນ-ອາຊຽນກໍຈະຂະຫຍາຍຕົວກ້າວສູ່ລວງເລິກແລະກວ້າງຂວາງໃຫ້ຫຼາຍຂຶ້ນຢ່າງບໍ່ຢຸດຢັ້ງ.
