ທ່ານໂດນັນ ທຣຳ ປະທານາທິບໍດີອາເມລິກາ ປະກາດໃນວັນທີ 13 ມີນານີ້ວ່າ: ຈະສະເໜີໃຫ້ທ່ານໄມຄ໌ ພົມເພວ ຫົວໜ້າອົງການຂ່າວລັບສູນກາງ ຫຼື CIA ເປັນລັດຖະມົນຕີກະຊວງການຕ່າງປະເທດ ໂດຍປ່ຽນແທນທ່ານເຣັກ ຕີເລີເຊິນ.
ທ່ານໂດນັນ ທຣຳ ໄດ້ເປີດເຜີຍການຕົກລົງດັ່ງກ່າວໂດຍຜ່ານສື່ສັງຄົມອອນລາຍ ຫຼັງຈາກນັ້ນ, ທ່ານກໍໄດ້ລະບຸໃນຖະແຫຼງການສະບັບໜຶ່ງຂອງທຳນຽບຂາວວ່າ: ໃນໜຶ່ງປີປາຍຜ່ານມາ, ຕົນຮູ້ທ່ານພົມເພວ ດີສົມຄວນ ແລະເຫັນວ່າທ່ານເປັນຜູ້ດຳລົງຕຳແໜ່ງລັດຖະມົນຕີກະຊວງການຕ່າງປະເທດທີ່ດີໃນປັດຈຸບັນທີ່ເປັນ "ໄລຍະສຳຄັນທີ່ສຸດ" ຕົນຄອງຄອຍວ່າ ທ່ານພົມເພວ ຈະສືບຕໍ່ຊຸກຍູ້ຂະບວນການປອດນິວເຄລຍຂອງແຫຼມເກົາຫຼີ. ຂະນະດຽວກັນ, ທ່ານໂດນັນ ທຣຳ ກໍສະແດງຄວາມຂອບໃຈຕໍ່ທ່ານຕີເລີເຊິນ ທີ່ມີການປະກອບສ່ວນໃນໜຶ່ງປີປາຍຜ່ານມາ.
ຂ່າວລາຍງານຕື່ມວ່າ ທ່ານພົມເພວ ຍັງຕ້ອງຜ່ານການລົງຄະແນນສຽງຢູ່ສະພາສູງແລ້ວຈຶ່ງສາມາດເຂົ້າຮັບຕຳແໜ່ງລັດຖະມົນຕີກະຊວງການຕ່າງປະເທດຢ່າງເປັນທາງການໄດ້.
