ກະຊວງແຮງງານແລະການອົບຮົມວິຊາຊີບກຳປູເຈຍ ໄດ້ເປີດເຜີຍໃນວັນທີ 13 ມີນານີ້ວ່າ: ຂະແໜງການຜະລິດເຄື່ອງນຸ່ງສຳເລັດຮູບ ແລະ ເກີບປະເທດຕົນສາມາດສ້າງວຽກເຮັດງານທຳໄດ້ເຖິງ 770.000 ກວ່າຕຳແໜ່ງໃນປີຜ່ານມາ.
ກຳປູເຈຍແມ່ນໜຶ່ງໃນປະເທດທີ່ສົ່ງອອກເຄື່ອງນຸ່ງສຳເລັດຮູບທີ່ສຳຄັນຂອງໂລກ ໃນປີຜ່ານມາ, ໂຮງງານຜະລິດເຄື່ອງນຸ່ງສຳເລັດຮູບ ແລະ ເກີບໃນທົ່ວປະເທດມີເຖິງ 1.154 ແຫ່ງ ເພີ່ມຂຶ້ນ 4,25% ເມື່ອທຽບໃສ່ປີ 2016 ແລະ ຜູ້ມີວຽກເຮັດງານທຳໄດ້ເພີ່ມຂຶ້ນ 4,42% ເມື່ອທຽບໃສ່ປີ 2016 ໃນນີ້ກຳມະກອນຍິງມີເຖິງ 640.000 ຄົນ.
ທ່ານອິດຊຳເຮງ ລັດຖະມົນຕີກະຊວງແຮງງານແລະການອົບຮົມວິຊາຊີບກຳປູເຈຍ ກ່າວໃນວັນທີ 12 ມີນານີ້ວ່າ: ໃນ 20 ປີກ່ອນ, ທົ່ວປະເທດກຳປູເຈຍມີໂຮງງານຜະລິດເຄື່ອງນຸ່ງສຳເລັດຮູບແລະເກີບພຽງແຕ່ 64 ແຫ່ງເທົ່ານັ້ນ, ມູນຄ່າສົ່ງອອກແມ່ນ 200 ລ້ານໂດລາສະຫະລັດ ແລະ ຜູ້ປະກອບອາຊີບໃນຂະແໜງການດັ່ງກ່າວມີພຽງແຕ່ 80.000 ຄົນເທົ່ານັ້ນ. ຂະນະທີ່ປັດຈຸບັນ, ກຳມະກອນໃນທົ່ວປະເທດໄດ້ປັບຂຶ້ນເງິນເດືອນ 13 ເທື່ອແລ້ວ ໂດຍເລີ່ມຈາກ 30 ໂດລາສະຫະລັດຕໍ່ເດືອນໃນເມື່ອກ່ອນ ເພີ່ມຂຶ້ນເປັນ 170 ໂດລາສະຫະລັດໃນປີນີ້ ບວກກັບເງິນອຸດໜູນອື່ນໆແລ້ວ, ປັດຈຸບັນ ກຳມະກອນມີລາຍຮັບປະມານ 200 ໂດລາສະຫະລັດຕໍ່ເດືອນ.
