ຈີນສ້າງຕັ້ງຄະນະກຳມະການກວດກາແຫ່ງລັດສອດຄ່ອງກັບຄວາມຮຽກຮ້ອງຕ້ອງການແຫ່ງການພັດທະນາຂອງຍຸກສະໄໝ

ວັນທີ 13 ມີນານີ້, ກອງປະຊຸມເທື່ອທຳອິດຂອງສະພາປະຊາຊົນແຫ່ງຊາດຈີນຊຸດທີ 13 ໄດ້ພິຈາລະນາຮ່າງກົດໝາຍກວດກາແຫ່ງລັດຂອງສາທາລະນະລັດປະຊາຊົນຈີນ. ວົງການການເມືອງຂອງໄທໄດ້ໃຫ້ຄວາມສົນໃຈຫຼາຍຕໍ່ເລື່ອງນີ້ ໂດຍທ່ານໄພສານ ພືດມົງຄົນ ທີ່ປຶກສາຮອງນາຍົກລັດຖະມົນຕີໄທ, ຮອງປະທານສະມາຄົມວັດທະນະທຳເສດຖະກິດໄທ-ຈີນໃຫ້ສຳພາດຕໍ່ນັກຂ່າວ CRI ວ່າ: ການສ້າງຕັ້ງຄະນະກຳມະການກວດກາແຫ່ງລັດຈະກວມເອົາກຳລັງກວດກາລະບຽບວິໄນຂອງຈີນ ເຊິ່ງສອດຄ່ອງກັບຄວາມຮຽກຮ້ອງຕ້ອງການແຫ່ງການພັດທະນາຂອງຍຸກສະໄໝ.

ທ່ານໄພສານ ພືດມົງຄົນກ່າວວ່າ: ການສ້າງຕັ້ງຄະນະກຳມະການກວດກາແຫ່ງລັດສອດຄອງກັບຄວາມຮຽກຮ້ອງຕ້ອງການແຫ່ງການພັດທະນາຂອງຍຸກສະໄໝ. ນັບແຕ່ກອງປະຊຸມໃຫຍ່ຄັ້ງທີ 18 ຂອງພັກກອມມູນິດຈີນເປັນຕົ້ນມາ, ທ່ານເລຂາທິການໃຫຍ່ສີຈິ້ນຜິງໃຫ້ຄວາມສຳຄັນສູງຕໍ່ວຽກງການຕ້ານການສໍ້ລາດບັງຫຼວງ,ເຮັດໃຫ້ພັກກອມມູນິດຈີນມີພະລັງຊີວິດກວ່າເກົ່າ.ການສ້າງຕັ້ງຄະນະກຳມະການກວດກາແຫ່ງລັດເທື່ອນີ້ຈະກວມເອົາກຳລັງກວດກາລະບຽບວິໄນຂອງຈີນແລະປະກອບເປັນອົງການກວດກາແຫ່ງລັດ ເຊິ່ງເປັນຂໍ້ຕົກລົງທີ່ຖືກຕ້ອງແລະຈຳເປັນທີ່ສຸດ.