ການປະຕິຮູບໂຄງປະກອບການຈັດຕັ້ງຂອງລັດຖະບານຈີນເປັນຜົນສຳເລັດອີກດ້ານໜຶ່ງໃນການລົງເລິກການປະຕິຮູບພາຍໃຕ້ການນຳພາຂອງພັກກອມມູນິດຈີນ

ວັນທີ 13 ມີນານີ້,ກອງປະຊຸມເທື່ອທີ 1 ຂອງສະພາປະຊາຊົນແຫ່ງຊາດຈີນຊຸດທີ 13 ໄດ້ຄົ້ນຄວ້າພິຈາລະນາ ແຜນການປະຕິຮູບໂຄງປະກອບການຈັດຕັ້ງຂອງລັດຖະບານຈີນ. ວົງການການເມືອງຂອງໄທໄດ້ຕີລາຄາສູງຕໍ່ແຜນການປະຕິຮູບດັ່ງກ່າວ.

ທ່ານໄພສານ ພືດມົງຄົນ ທີ່ປຶກສາຮອງນາຍົກລັດຖະມົນຕີໄທ, ຮອງປະທານສະມາຄົມວັດທະນະທຳເສດຖະກິດໄທ-ຈີນໃຫ້ສຳພາດຕໍ່ນັກຂ່າວ CRI ວ່າ: ນີ້ຄືຜົນສຳເລັດອີກດ້ານໜຶ່ງ ໃນການລົງເລິກການປະຕິຮູບພາຍໃຕ້ການນຳພາຂອງພັກກອມມູນິດຈີນ. ທ່ານກ່າວວ່າ: "ຫຼັງກອງປະຊຸມໃຫຍ່ຄັ້ງທີ 19 ຂອງພັກກອມມູນິດຈີນໄດ້ວາງມາດຕະການປະຕິຮູບຫຼາຍປະການ. ການປະຕິຮູບໂຄງປະກອບການຈັດຕັ້ງຂອງລັດຖະບານຈີນແມ່ນປະຕິບັດຕົວຈິງຕາມຈິດໃຈຊີ້ນຳຂອງສູນກາງພັກກອມມູນິດຈີນ. ເທື່ອນີ້ຈະມີເຈົ້າໜ້າທີ່ຜູ້ມີຄວາມສາມາດໂດດເດັ່ນຂຶ້ນດຳລົງຕຳແໜ່ງການນຳຂອງບັນດາອົງການຈັດຕັ້ງລັດຖະບານຫຼາຍກວ່າເກົ່າ, ເຂົາເຈົ້າຈະປະສານສົມທົບຮ່ວມມືກັນເພື່ອຮັບໃຊ້ປະຊາຊົນ. ຂ້າພະເຈົ້າເຊື່ອໝັ້ນວ່າການປະຕິຮູບໂຄງປະກອບການຈັດຕັ້ງຂອງລັດຖະບານຈີນຈະໄດ້ຮັບໝາກຜົນຕາມເປົ້າໝາຍທີ່ກຳນົດໄວ້."