ວັນທີ 15 ມີນານີ້, ທ່ານ ຮຸນແຊນ ນາຍົກລັດຖະມົນຕີກຳປູເຈຍກ່າວວ່າ: ປະເທດຕົນຄວນເພີ່ມທຶນເຂົ້າໃນການຄົ້ນຄວ້າວິທະຍາສາດ,ເພື່ອໄລ່ໃຫ້ທັນການປະຕິວັດອຸດສາຫະກຳຄັ້ງທີ 4.
ທ່ານ ຮຸນແຊນ ກ່າວວ່າ: ຜົນສຳເລັດດ້ານວິທະຍາສາດເຕັກນິກຂອງກຳປູເຈຍບໍ່ດີທໍ່ປະເທດອື່ນໆໃນອາຊຽນ ແລະມີຄວາມແຕກໂຕນກັນໃນຂົງເຂດນີ້. ສ່ວນການເຕີບໂຕດ້ານເສດຖະກິດກຳປູເຈຍບໍ່ອາດຈະອາໄສພຽງແຕ່ກະສິກຳແລະອຸດສາຫະກຳການຕັດຫຍິບເຄື່ອງນຸ່ງເທົ່ານັ້ນ,ຄວນເລັ່ງລັດການພັດທະນາດ້ານວິທະຍາສາດເຕັກນິກ. ປັດຈຸບັນ, ຫຼາຍປະເທດເຊັ່ນ: ສິງກະໂປ, ຟີລິບປິນ, ໄທແລະມາເລເຊຍເປັນຕົ້ນລ້ວນແຕ່ໄດ້ຊຸກຍູ້ການເຕີບໂຕຂອງເສດຖະກິດແຫ່ງຊາດດ້ວຍວິທະຍາສາດເຕັກນິກ.
ທ່ານ ຮຸນແຊນ ກ່າວຕື່ມວ່າ: ລັດຖະບານປະເທດຕົນຈະເພີ່ມງົບປະມານການຄົ້ນຄວ້າວິທະຍາສາດ ໂດຍເມື່ອຮອດປີ 2020, ງົບປະມານດັ່ງກ່າວຈະກວມ 0,2% ຂອງລວມຍອດມູນຄ່າຜະລິດຕະພັນພາຍໃນຫຼື GDP ຂອງປະເທດຕົນ, ປີ 2025 ຈະເພີ່ມຂຶ້ນເປັນ 1% ແລະ ປີ 2030 ຈະເພີ່ມຂຶ້ນເປັນ 1,5%.
 |
