ຕອນເຊົ້າວັນທີ 19 ມີນານີ້,ຢູ່ "ຊ່ອງທາງລັດຖະມົນຕີ"ຂອງກອງປະຊຸມເທື່ອທີ 1 ຂອງສະພາປະຊາຊົນແຫ່ງຊາດຈີນຊຸດທີ 13 ທີ່ຈັດຂຶ້ນຢູ່ປັກກິ່ງ, ທ່ານຫວາງຈື້ກ່າງ ລັດຖະມົນຕີກະຊວງວິທະຍາສາດເຕັກໂນໂລຊີຈີນຄົນໃໝ່ໄດ້ໃຫ້ສຳພາດຕໍ່ນັກຂ່າວວ່າ: ຈະເຮັດໃຫ້ວິທະຍາສາດເຕັກໂນໂລຊີຈີນປະກອບສ່ວນເຂົ້າໃນວິທະຍາສາດເຕັກໂນໂລຊີຂອງໂລກ.
ທ່ານຫວາງຈື້ກ່າງກ່າວວ່າ: ໃນຖານະເປັນລັດຖະມົນຕີກະຊວງວິທະຍາສາດເຕັກໂນໂລຊີຄົນໃໝ່, ສິ່ງສຳຄັນທີ່ຕົນພິຈາລະນານັ້ນຄືເຮັດແນວໃດຈິ່ງຈະສາມາດເສີມຂະຫຍາຍບົດບາດຂອງວິທະຍາສາດເຕັກໂນໂລຊີທີ່ເປັນກຳລັງການຜະລິດທີໜຶ່ງເພື່ອເຮັດໃຫ້ວິທະຍາສາດເຕັກໂນໂລຊີຂອງຈີນປະກອບສ່ວນໃໝ່ໃຫຍ່ຫຼວງກວ່າເກົ່າເຂົ້າໃນການພັດທະນາແບບທັນສະໄໝຂອງຈີນ.
ທ່ານຍັງກ່າວຕື່ມວ່າ: ວຽກງານວິທະຍາສາດເຕັກໂນໂລຊີຄວນຫັນໜ້າສູ່ແນວໜ້າວິທະຍາສາດເຕັກໂນໂລຊີ, ຫັນໜ້າສູ່ຄວາມຮຽກຮ້ອງຕ້ອງການເພື່ອຈັດຕັ້ງປະຕິບັດຍຸດທະສາດສຳຄັນຂອງຊາດ, ຫັນໜ້າສູ່ສະໜາມຮົບຫຼັກແຫ່ງການພັດທະນາເສດຖະກິດສັງຄົມ. ຄວນສ້າງສະພາບແວດລ້ອມທີ່ດີເພື່ອໃຫ້ພະນັກງານວິທະຍາສາດເຕັກໂນໂລຊີແລະບຸກຄົນວົງການຕ່າງໆໃນສັງຄົມສາມາດມີສ່ວນຮ່ວມ ໃນຂົງເຂດວຽກງານວິທະຍາສາດເຕັກໂນໂລຊີໃຫ້ຫຼາຍກວ່າເກົ່າ ແລະສ້າງບັນຍາກາດທີ່ທົ່ວສັງຄົມເຄົາລົບນັບຖືຜູ້ມີຄວາມຮູູ້ຄວາມສາມາດແລະວິທະຍາສາດເຕັກໂນໂລຊີ.
