ກອງປະຊຸມສຸດຍອດວິສາມັນອາຊຽນ-ອົສຕຼາລີທີ່ດຳເນີນມາເປັນເວລາ 2 ວັນໄດ້ອັດລົງຢູ່ນະຄອນຊິດນີຂອງອົສຕຼາລີໃນວັນທີ 18 ມີນານີ້. ນີ້ແມ່ນຄັ້ງທຳອິດທີ່ອົສຕຼາລີເຊື້ອເຊີນຜູ້ນຳອາຊຽນຈັດກອງປະຊຸມສຸດຍອດດັ່ງກ່າວໃນຖານະເປັນເຈົ້າພາບ.
ຝ່າຍຕ່າງໆທີ່ຮ່ວມປະຊຸມໄດ້ຮ່ວມກັນອອກ "ຖະແຫຼງການຊິດນີ" ໂດຍລະບຸວ່າ, ກອງປະຊຸມສຸດຍອດວິສາມັນຄັ້ງນີ້ເປັນຂີດໝາຍສະແດງໃຫ້ເຫັນວ່າອາຊຽນແລະອົສຕຼາລີໄດ້ກ້າວເຂົ້າສູ່ໄລຍະໃໝ່ທີ່ສາຍພົວພັນນັບມື້ນັບໃກ້ຊິດກວ່າເກົ່າ.
ໃນຂົງເຂດຕໍ່ຕ້ານລັດທິກໍ່ການຮ້າຍ, ອາຊຽນແລະອົສຕຼາລີໄດ້ຮ່ວມລົງນາມໃນ "ບົດບັນທຶກຄວາມເຂົ້າໃຈກ່ຽວກັບການຕໍ່ຕ້ານລັດທິກໍ່ການຮ້າຍສາກົນ" ໃນວັນທີ 17 ມີນານີ້. ສຳລັບຂົງເຂດເສດຖະກິດ, ສອງຝ່າຍກ່າວຢ້ຳວ່າຈະເພີ່ມທະວີການຄ້າການການລົງທຶນ, ຄັດຄ້ານລັດທິປົກປ້ອງການຄ້າບໍ່ວ່າແມ່ນຮູບການໃດໆ, ເພື່ອຊຸກຍູ້ໃຫ້ເສດຖະກິດຂອງພາກພື້ນພັດທະນາຈະເລີນຮຸ່ງເຮືອງ.
ນອກນີ້, ລັດຖະບານອົສຕຼາລີເປີດເຜີຍໃນວັນທີ 18 ມີນານີ້ວ່າ, ຈະສະໜອງທຶນ 23 ລ້ານໂດລາສະຫະລັດເພື່ອຊ່ວຍເຫຼືອປະເທດອາຊຽນສ້າງຕົວເມືອງແບບສະມາດແລະພັດທະນາແບບຍືນຍົງໃນ 5 ປີຕໍ່ໜ້າ.
 |
