ອົງການໄອຍະການຂອງສ.ເກົາຫຼີ ຮ້ອງຂໍໃຫ້ເຈົ້າໜ້າທີ່ຈັບຕົວອະດີດປະທານາທິບໍດີ

ວັນທີ 19 ມີນານີ້, ອົງການໄອຍະການຂອງສູນກາງເຊອູນປະເທດ ສ.ເກົາຫຼີໄດ້ຮ້ອງຂໍໃຫ້ສານຈັບຕົວທ່ານ ລີມຽງບັກ ອະດີດປະທານາທິບໍດີ ສ.ເກົາຫຼີ ແລະສານຈະພິຈາລະນາແລະຕັດສິນຈະອອກຄຳສັ່ງຈັບຕົວທ່ານ ລີມຽງບັກ ຫຼືບໍ່. ຂ່າວແຈ້ງວ່າ: ສານຂອງ ສ.ເກົາຫຼີ ຈະປະກາດຜົນການຕັດສິນໄວທີ່ສຸດໃນວັນທີ 21 ມີນານີ້.

ເຈົ້າໜ້າທີ່ໄອຍະການຂອງ ສ.ເກົາຫຼີ ກ່າວວ່າ: ທ່ານ ລີມຽງບັກຖືກສົງໄສວ່າຮັບສິນບົນ 11 ຕື້ວອນ ຫຼື ປະມານ 10.350.000 ໂດລາສະຫະລັດ,ເພື່ອສ້າງມູນນິທິລັບທີ່ມີເງິນປະມານ 35 ຕື້ວອນ ຫຼື ປະມານ 32.930.000 ໂດລາສະຫະລັດໂດຍຜ່ານບໍລິສັດ DAS ທີ່ຄຸ້ມຄອງໂດຍວິສາຫະກິດຜະລິດຊີ້ນສ່ວນອາໄຫຼ່ລົດ.

ຕາມໃບຮ້ອງຂໍຄຳສັ່ງຈັບຕົວທີ່ເຈົ້າໜ້າທີ່ໄອຍະການຍື່ນໃຫ້ສານ, ທ່ານ ລີມຽງບັກໄດ້ຖືກສົງໄສຕ້ອງໂທດ 12 ລາຍການ ເຊິ່ງລວມທັງການຮັບສິນບົນ,ຍັກຍອກເງິນຫຼວງ,ໜີພາສີແລະໃຊ້ອຳນາດໃນທາງທີ່ບໍ່ຖືກຕ້ອງຕາມກົດໝາຍ.