ກອງປະຊຸມຄັ້ງທີ 1 ຂອງສະພາປະຊາຊົນແຫ່ງຊາດຈີນສະໄໝທີ 13 ໄດ້ປິດລົງຢູ່ນະຄອນຫຼວງປັກກິ່ງໃນຕອນເຊົ້າວັນທີ 20 ມີນານີ້. ທ່ານສີຈິ້ນຜິງ ປະທານປະເທດຈີນໄດ້ກ່າວປາໄສຄັ້ງທຳອິດຫຼັງໄດ້ຮັບເລືອກຕັ້ງເປັນປະທານປະເທດຈີນອີກວາລະໜຶ່ງ, ທ່ານກ່າວວ່າຈະປະຕິບັດ ໜ້າທີ່ຮັບຜິດຊອບທີ່ລັດຖະທຳມະນູນມອບໃຫ້ຢ່າງຊື່ສັດຕະຫຼອດໄປ, ຮັບໃຊ້ປະຊາຊົນແລະໄດ້ຮັບການຕິດຕາມຈາກປະຊາຊົນ. ທ່ານກ່າວເນັ້ນວ່າ, ສັງຄົມນິຍົມທີ່ມີສີສັນພິເສດຂອງຈີນໃນຍຸກໃໝ່ຂຶ້ນກັບປະຊາຊົນຈີນທຸກຄົນ, ພຽງແຕ່ປະຊາຊົນຈີນສາມັກຄີປອງດອງແລະສູ້ຊົນຮ່ວມກັນ, ຈະບໍ່ມີກຳລັງໃດໆສາມາດສະກັດກັ້ນບາດກ້າວຂອງປະຊາຊົນຈີນທີ່ບັນລຸຄວາມໄຝ່ຝັນຂອງຕົນ. ຕໍ່ໄປເຊິ່ງຟັງລາຍງານລະອຽດ:
"ການທີ່ດຳລົງຕຳແໜ່ງປະທານປະເທດຂອງສາທາລະນະລັດປະຊາຊົນຈີນທີ່ສູງສົ່ງ, ມີພາລະກຳສະຫງ່າງາມ, ແລະມີຄວາມຮັບຜິດຊອບສຳຄັນຍິ່ງ. ຂ້າພະເຈົ້າຈະເຮັດຄືແຕ່ເກົ່າເມືອຫຼັງ, ປະຕິບັດຕາມໜ້າທີ່ຮັບຜິດຊອບທີ່ລັດຖະທຳມະນູນມອບໃຫ້ຢ່າງຊື່ສັດ, ຈົງຮັກພັກດີຕໍ່ປະເທດຊາດແລະປະຊາຊົນ, ພະຍາຍາມຈົນສຸດຄວາມສາມາດເພື່ອເຮັດວຽກໃຫ້ດີ, ອຸທິດຕົວຢ່າງບໍລິສຸດໃຈ, ຮັບໃຊ້ປະຊາຊົນແລະຮັບການຕິດຕາມຈາກປະຊາຊົນ, ບໍ່ເຮັດໃຫ້ຜິດຫວັງຕໍ່ຄວາມເຊື່ອໝັ້ນຂອງບັນດາຜູ້ແທນແລະປະຊາຊົນບັນດາເຜົ່າໃນທົ່ວປະເທດ."
ໃນພິທີປິດກອງປະຊຸມຄັ້ງນີ້, ທ່ນສີຈິ້ນຜິງໄດ້ໃຫ້ຄຳໝັ້ນສັນຍາດ້ວຍຄວາມຈິງໃຈຕໍ່ກັບຜູ້ແທນສະພາປະຊາຊົນແຫ່ງຊາດຈີນປະມານ 3000 ຄົນ. ວັນທີ 17 ມີນານີ້ໃນການເລືອກຕັ້ງປະທານປະເທດຈີນ, ທ່ານສີຈິ້ນຜິງໄດ້ຮັບເລືອກຕັ້ງເປັນປະທານປະເທດຈີນດ້ວຍບັດເຫັນດີທັງໝົດ, ບັນດາຜູ້ແທນທັງໝົດໄດ້ອວຍພອນທ່ານໂດຍການຕົບມືແລະຮ້ອງເຊຍດ້ວຍຄວາມຍິນດີເປັນຢ່າງຍິ່ງ.
ໃນຄຳປາໄສຂອງທ່ານ ສີຈິ້ນຜິງ, ໄດ້ກ່າວເຖິງ "ປະຊາຊົນ" ຕະຫຼອດ. ທ່ານໄດ້ເຕືອນໃຫ້ພະນັກງານອົງການລັດທຸກຄົນ ບໍ່ວ່າຕຳແໜ່ງຈະສູງເທົ່າໃດກໍ່ຕາມ, ລ້ວນແຕ່ຕ້ອງຈື່ຈຳປະເທດຕົນແມ່ນສາທາລະນະລັດປະຊາຊົນຈີນ,ຕ້ອງຖືປະຊາຊົນໄວ້ຢູ່ຖານະສູງທີ່ສຸດໃນຈິດໃຈຂອງຕົນຢ່າງສະເໝີຕົ້ນສະເໝີປາຍ,ຮັບໃຊ້ປະຊາຊົນຢ່າງສຸດອົກສຸດໃຈແລະສະເໝີຕົ້ນສະເໝີປາຍ,ພະຍາຍາມເຮັດວຽກເພື່ອຜົນປະໂຫຍດແລະຄວາມສຸກຂອງປະຊາຊົນຢ່າງສະເໝີຕົ້ນສະເໝີປາຍ.
ໃນຄຳປາໄສ, ທ່ານ ສີຈິ້ນຜິງ ໄດ້ທົບທວນຄືນອາລະຍະທຳຂອງຊົນຊາດຈີນທີ່ໄດ້ສືບທອດກັນມາເປັນເວລາຫຼາຍພັນປີ, ທ່ານກ່າວເນັ້ນວ່າ: ປະຊາຊົນຈີນໄດ້ອົບຮົມສ້າງ,ສືບທອດແລະພັດທະນາຈິດໃຈຊົນຊາດທີ່ຍິ່ງໃຫຍ່ໃນການສູ້ຊົນໄລຍະຍາວ ເຊິ່ງໄດ້ສະໜອງພະລັງຈິດໃຈທີ່ເຂັ້ມແຂງໃຫ້ແກ່ການພັດທະນາຂອງຈີນແລະຄວາມກ້າວໜ້າຂອງອາລະຍະທຳມວນມະນຸດ. ປະຊາຊົນຈີນເປັນປະຊາຊົນທີ່ມີຈິດໃຈແຫ່ງການປະດິດສ້າງທີ່ຍິ່ງໃຫຍ່,ຈິດໃຈສູ້ຊົນທີ່ຍິ່ງໃຫຍ່,ຈິດໃຈສາມັກຄີທີ່ຍິ່ງໃຫຍ່ແລະຈິດໃຈແຫ່ງຄວາມຝັນທີ່ຍິ່ງໃຫຍ່.
"ທ່ານກ່າວວ່າ:ປະຊາຊົນຈີນເຊື່ອໝັ້ນວ່າ:ບໍ່ວ່າໜ່ວຍພູຈະສູງຊ່ຳໃດ,ແຕ່ຖ້າຢາກປີນຂຶ້ນຍອດພູ,ກໍ່ຈະຂຶ້ນຮອດໄດ້ຢ່າງແນ່ນອນ;ບໍ່ວ່າເສັ້ນທາງຈະຍາວຊ່ຳໃດ,ພະຍາຍາມຍ່າງກໍ່ຈະສາມາດໄປຮອດຈຸດໝາຍປາຍທາງໄດ້. ໃນສັດຕະວັດມໍ່ໆມານີ້, ການບັນລຸຄວາມຈະເລີນທີ່ຍິ່ງໃຫຍ່ຂອງຊົນຊາດຈີນໄດ້ກາຍເປັນຄວາມຝັນທີ່ຍິ່ງໃຫຍ່ຂອງຊົນຊາດຈີນ,ປະຊາຊົນຈີນໄດ້ຜ່ານຜ່າຄວາມຫຍຸ້ງຍາກຕ່າງໆແລະມີຈິດໃຈອົດທົນທໍລະມານລຳບາກ,ຖືຈິດໃຈຕໍ່ສູ້ກັບສັດຕູຢ່າງເດັດດ່ຽວໜຽວແໜ້ນ,ຄວາມຕັດສິນໃຈໃນການຟື້ນຕົວຂຶ້ນບົນພື້ນຖານກຳລັງຂອງຕົນ,ຄວາມສາມາດທີ່ຢືນຢູ່ຄຽງຂ້າງກັບປະຊາຊົນຂອງບັນດາປະເທດໃນໂລກ,ແລະໄດ້ສູ້ຊົນຢ່າງຕໍ່ເນື່ອງເປັນເວລາ 170 ກວ່າປີເພື່ອບັນລຸຄວາມຝັນທີ່ຍິ່ງໃຫຍ່ດັ່ງກ່າວ. ປັດຈຸບັນ,ປະຊາຊົນຈີນຍິ່ງມີຄວາມໝັ້ນໃຈ,ມີຄວາມສາມາດແລະຍິ່ງໃກ້ກັບເປົ້າໝາຍຂອງການບັນລຸຄວາມຈະເລີນຮຸ່ງເຮືອງຂອງຊົນຊາດຈີນບໍ່ວ່າທຽບກັບໄລຍະໃດໆໃນປະຫວັດສາດ. ຂ້າພະເຈົ້າເຊື່ອໝັ້ນວ່າ:ຂໍພຽງແຕ່ປະຊາຊົນຈີນ 1.300.000.000 ກວ່າຄົນເສີມຂະຫຍາຍຈິດໃຈແຫ່ງຄວາມຝັນທີ່ຍິ່ງໃຫຍ່ແບບນີ້,ພວກເຮົາກໍ່ຈະສາມາດບັນລຸຄວາມຈະເລີນທີ່ຍິ່ງໃຫຍ່ຂອງຊົນຊາດຈີນໄດ້ຢ່າງແນ່ນອນ."
ທ່ານສີຈິ້ນຜິງກ່າວເນັ້ນວ່າ, ສິດອຳນາດທັງໝົດຂອງຊາດເປັນຂອງປະຊາຊົນ. ປະຊາຊົນມີຄວາມໝັ້ນໃຈ, ປະເທດຊາດຈິ່ງມີອະນາຄົດ ແລະ ຊົນຊາດຈິ່ງມີພະລັງແຮງ.
ຄວນຖືເອົາເລື່ອງທີ່ປະຊາຊົນສະໜັບສະໜູນຫຼືບໍ່, ເຫັນດີຫຼືບໍ່ ແລະ ພໍໃຈຫຼືບໍ່ ເປັນມາດຕະຖານກົກຮາກໃນການຊັ່ງຊາຕີລາຄາທຸກວຽກງານ, ອອກແຮງແກ້ໄຂບັນຫາຜົນປະໂຫຍດທີ່ປະຊາຊົນສົນໃຈທີ່ສຸດ, ພົວພັນກັບປະຊາຊົນໂດຍກົງທີ່ສຸດ ແລະ ຕິດແທດຕົວຈິງທີ່ສຸດ ເພື່ອເຮັດໃຫ້ປະຊາຊົນຈີນທຸກຖ້ວນໜ້າ ແລະ ລູກຫຼານປະຊາຊາດຈີນແບ່ງປັນຄວາມສຸກ ແລະ ກຽດສັກສີຮ່ວມກັນ ໃນຂະບວນວິວັດປະຫວັດສາດແຫ່ງການຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງປະຊາຊາດຈີນ.
ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 19 ຂອງພັກກອມມູນິດຈີນໄດ້ວາງເປົ້າໝາຍຍິ່ງໃຫຍ່ ແຫ່ງການສູ້ຊົນສ້າງສັງຄົມອີ່ມໜຳສຳລານໃນໄລຍະສຸດທ້າຍ, ເປີດຂະບວນການໃໝ່ແຫ່ງການສ້າງປະເທດສັງຄົມນິຍົມທັນສະໄໝຢ່າງຮອບດ້ານ ແລະ ບັນລຸການຟື້ນຟູຄວາມຈະເລີນຮຸ່ງເຮືອງຂອງປະຊາຊາດຈີນ. ທ່ານສີຈິ້ນຜິງຊີ້ອອກວ່າ, ເພື່ອເຮັດໃຫ້ແຜນການດັ່ງກ່າວບັນລຸຄວາມເປັນຈິງ ເປັນການເດີນທັບທາງໄກບັ້ນໃໝ່ ແລະ ຈະມີຈິດໃຈລົດລະບໍ່ໄດ້ຢ່າງເດັດຂາດ. ຈະບໍ່ສາມາດພໍໃຈຕໍ່ສະພາບປັດຈຸບັນ, ບໍ່ສາມາດຢູ່ສະໜຸກສຸກສະບາຍ ແລະ ຫຼົງລືມໜ້າທີ່ຂອງຕົນ, ບໍ່ຄວນລືມອຸດົມການ, ຄວນຈົດຈຳພາລະກຳ ແລະ ບາກບັ່ນສູ້ຊົນ. ຕ້ອງລົງເລິກການປະຕິຮູບ ແລະ ເປີດປະຕູສູ່ພາຍນອກຢ່າງຮອບດ້ານ ດ້ວຍຄວາມພະຍາຍາມຫຼາຍກວ່າເກົ່າ ແລະ ມາດຕະການທີ່ຕິດແທດຕົວຈິງກວ່າເກົ່າ; ເສີມຂະຫຍາຍປະຊາທິປະໄຕສັງຄົມນິຍົມ, ຊຸກຍູ້ໃຫ້ລະບົບ ແລະ ຄວາມສາມາດປົກຄອງປະເທດຫັນເປັນແບບທັນສະໄໝ; ເລັ່ງສ້າງປະເທດສັງຄົມນິຍົມທັນສະໄໝທີ່ເຂັ້ມແຂງດ້ານວັດທະນະທຳ; ຮັບປະກັນ ແລະ ປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ, ເອົາຊະນະການແກ້ໄຂບັນຫາຄວາມທຸກຍາກຢ່າງເດັດຂາດ ແລະ ຊຸກຍູ້ຄວາມຍຸດຕິທຳ ແລະ ຄວາເປັນທຳທາງສັງຄົມ; ຊຸກຍູ້ການສ້າງສາຄວາມສີວິໄລທາງລະບົບນິເວດ, ຕ້ອງຍຶດໝັ້ນການນຳພາເດັດຂາດຕໍ່ກອງທັບປະຊາຊົນຂອງພັກ, ເລັ່ງສ້າງລະບົບກຳລັງປະກອບອາວຸດທີ່ມີສີສັນພິເສດຂອງຈີນ ແລະ ເປັນລະດັບທີ່ນຳໜ້າຂອງໂລກ. ຕ້ອງຜັນຂະຫຍາຍທິດທາງ "ປະເທດດຽວສອງລະບອບ", "ຊາວຮົງກົງປົກຄອງຮົງກົງ", "ຊາວມາເກົາປົກຄອງມາເກົາ" ແລະ "ປົກຄອງຕົນເອງໃນລະດັບສູງ" ຢ່າງຮອບດ້ານ ແລະ ຖືກຕ້ອງ, ຍຶດໝັ້ນຫຼັກການປະເທດຈີນດຽວ, ຍຶດໝັ້ນ "ຄວາມເຫັນເປັນເອກະພາບກັນປີ 1992" ແລະ ຊຸກຍູ້ຂະບວນການໂຮມປະເທດຊາດເຂົ້າເປັນເອກະພາບກັນໂດຍສັນຕິ.
ທ່ານ ສີຈິ້ນຜິງ ກ່າວເນັ້ນວ່າ:
"ການທີ່ປົກປັກຮັກສາອະທິປະໄຕແລະຜືນແຜ່ນດິນອັນຄົບຖ້ວນຂອງຊາດ, ບັນລຸການທ້ອນໂຮມປະເທດຊາດໃຫ້ເປັນເອກະພາບກັນນັ້ນ ແມ່ນຄວາມປາຖະໜາຮ່ວມຂອງລູກຫຼານປະຊາຊາດຈີນທຸກຖ້ວນໜ້າ ແລະແມ່ນຜົນປະໂຫຍດພື້ນຖານຂອງປະຊາຊາດຈີນ. ຢູ່ຕໍ່ໜ້າຄວາມສັດຈະຂອງຊາດແລະແປວກະແສປະຫວັດສາດດັ່ງກ່າວນີ້, ທຸກໆການກະທຳແລະກົນອຸບາຍທີ່ແບ່ງແຍກປະເທດຊາດນັ້ນ ລ້ວນແຕ່ຈະປະລາໄຊຢ່າງແນ່ນອນ, ລ້ວນແຕ່ຈະຖືກປະຊາຊົນກ່າວປະນາມແລະຖືກປະຫວັດສາດລົງໂທດ. ປະຊາຊົນຈີນມີຈິດໃຈທີ່ເດັດດ່ຽວ, ມີຄວາມໝັ້ນໃຈຢ່າງເຕັມສ່ວນ ແລະມີຄວາມສາມາດຢ່າງພຽງພໍໃນການເອົາຊະນະທຸກໆການເຄື່ອນໄຫວທີ່ແບ່ງແຍກປະເທດຊາດ! ປະຊາຊົນຈີນ ແລະ ປະຊາຊາດຈີນມີຄວາມເຊື່ອຖືຮ່ວມອັນໜຶ່ງ, ນັ້ນກໍຄື: ດິນແດນແຕ່ລະຕາແມັດຂອງປະເທດຊາດທີ່ຍິ່ງໃຫຍ່ຂອງພວກເຮົາ ລ້ວນແຕ່ຈະຕັດແຍກອອກບໍ່ໄດ້ຢ່າງເດັດຂາດ ແລະກໍບໍ່ມີຄວາມອາດສາມາດທີ່ຈະຕັດແຍກອອກຢ່າງເດັດຂາດ!"
ທ່ານ ສີຈິ້ນຜິງ ກ່າວຢ້ຳວ່າ, ຈີນຈະບໍ່ພັດທະນາຕົນເອງໂດຍຖືເອົາການທຳລາຍຜົນປະໂຫຍດຂອງປະເທດອື່ນເປັນຄ່າຕອບແທນຢ່າງເດັດຂາດ, ການພັດທະນາຂອງຈີນ ຈະບໍ່ເປັນການຂົ່ມຂູ່ຕໍ່ປະເທດໃດໆ, ຈີນຈະບໍ່ເປັນເຈົ້າໂລກຈົນເທົ່າໃດໆ ແລະຈະບໍ່ຂະຫຍາຍອານາເຂດຈົນເທົ່າໃດໆ. ສຳລັບຄວາມປາຖະໜາດ້ວຍຄວາມຈິງໃຈແລະການກະທຳຕົວຈິງຂອງປະຊາຊົນຈີນໃນການປະກອບສ່ວນເພື່ອສັນຕິພາບແລະການພັດທະນາຂອງມວນມະນຸດ, ຜູ້ຄົນໃດໆກໍບໍ່ຄວນເຂົ້າໃຈໄປທາງອື່ນ, ຍິ່ງບໍ່ຄວນເຂົ້າໃຈຜິດ. ເພາະວ່າຢູ່ໃນໂລກມະນຸດນີ້ ຍ່ອມຈະມີຄວາມເປັນທຳ!
"ຈີນຈະສືບຕໍ່ຕັ້ງໜ້າປົກປັກຮັກສາຄວາມທ່ຽງທຳແລະຄວາມເປັນທຳສາກົນ, ມີຄວາມເຫັນວ່າ, ເລື່ອງຂອງໂລກຄວນໃຫ້ປະຊາຊົນບັນດາປະເທດປຶກສາຫາລືກັນ ແລະຈະບໍ່ບັງຄັບໃຫ້ຜູ້ອື່ນຮັບເອົາຄວາມເຫັນຂອງຕົນ. ຈີນຈະສືບຕໍ່ຊຸກຍູ້ການສ້າງໜຶ່ງແລວໜຶ່ງເສັ້ນທາງຢ່າງຕັ້ງໜ້າ, ເພີ່ມທະວີການແລກປ່ຽນແລະການຮ່ວມມືກັບບັນດາປະເທດໃນໂລກ, ເຮັດໃຫ້ການປະຕິຮູບແລະການພັດທະນາຂອງຈີນ ສ້າງຄວາມສຸກໃຫ້ແກ່ມວນມະນຸດ. ຈີນຈະສືບຕໍ່ຕັ້ງໜ້າເຂົ້າຮ່ວມການປະຕິຮູບແລະການສ້າງລະບົບການບໍລິຫານທົ່ວໂລກ, ອຸທິດສະຕິປັນຍາຂອງຈີນ, ແຜນການຂອງຈີນ ແລະກຳລັງຂອງຈີນໃຫ້ແກ່ໂລກ ຫຼາຍກວ່າເກົ່າ, ຊຸກຍູ້ການສ້າງໂລກທີ່ມີສັນຕິພາບຖາວອນ, ມີຄວາມໝັ້ນຄົງໂດຍທົ່ວໄປ, ມີຄວາມຈະເລີນຮຸ່ງເຮືອງຮ່ວມກັນ, ມີທ່າທີເປີດປະຕູ, ມີຈິດໃຈກວມລວມ ແລະມີຄວາມສວຍສົດງົດງາມ, ເຮັດໃຫ້ແສງຕາເວັນແຫ່ງການສ້າງປະຊາຄົມຮ່ວມຊາຕາກຳຂອງມວນມະນຸດນັ້ນເຍືອງໄປສູ່ທົ່ວໂລກ!"
ທ່ານ ສີຈິ້ນຜິງ ກ່າວວ່າ, ພັກກອມມູນິດຈີນ ຕ້ອງແບກຫາບໜ້າທີ່ປະຫວັດສາດໃນການນຳພາປະຊາຊົນເພື່ອດຳເນີນການປະຕິວັດທາງສັງຄົມອັນຍິ່ງໃຫຍ່, ຕ້ອງດຳເນີນການປະຕິວັດຕໍ່ຕົນເອງຢ່າງກ້າຫານ, ຍຶດໝັ້ນຫຼັກການທີ່ສ້າງພັກເພື່ອສ່ວນລວມແລະປົກຄອງປະເທດເພື່ອປະຊາຊົນ, ຮ່ວມຈິດຮ່ວມໃຈກັບປະຊາຊົນ, ຮ່ວມທຸກຮ່ວມສຸກກັບປະຊາຊົນ, ສາມັກຄີແລະບາກບັ່ນສູ້ຊົນກັບປະຊາຊົນຢ່າງສະເໝີຕົ້ນສະເໝີປາຍ, ຮັກສາລັກສະນະເດີມຂອງພັກກຳອຳນາດລັດທິມາກຈົນເທົ່າໃດໆ, ກ້າວເດີນຢູ່ແຖວໜ້າຂອງຍຸກສະໄໝຈົນເທົ່າໃດໆ ແລະເປັນກຳລັງຫຼັກແຫຼ່ງຂອງປະຊາຊົນຈີນແລະປະຊາຊາດຈີນຈົນເທົ່າໃດໆ!
"ຈີນມີກາບກອບທີ່ຂຽນໄວ້ວ່າ: ໃຜໆກໍສາມາດເບິ່ງເຫັນໂສມໜ້າຂອງລະດູໃບໄມ້ປົ່ງໄດ້, ເມື່ອລົມລະດູໃບໄມ້ປົ່ງພັດມາ ເຮັດໃຫ້ດອກໄມ້ນານາຊະນິດເບັ່ງບານ, ມີຫຼາຍສີຫຼາຍສັນ, ແຫ່ງຕ່າງໆລ້ວນແຕ່ມີທິວທັດລະດູບານໃໝ່. ພາຍໃຕ້ການນຳພາຂອງພັກກອມມູນິດຈີນ, ເມື່ອໄດ້ບາກບັ່ນສູ້ຊົນເປັນເວລາເກືອບ 70 ປີ, ສາທາລະນະລັດປະຊາຊົນຂອງພວກເຮົາພວມເຕີບໃຫຍ່ຂຶ້ນ ແລະຢືນຢູ່ທິດຕາເວັນອອກຂອງໂລກດ້ວຍໂສມໜ້າໃໝ່. ຍຸກໃໝ່ຂຶ້ນກັບທຸກໆຄົນ ແລະທຸກໆຄົນກໍເປັນສັກຂີພິຍານ, ເປັນຜູ້ບຸກເບີກ ແລະເປັນຜູ້ສ້າງສາຍຸກໃໝ່. ຂໍພຽງແຕ່ວ່າພວກເຮົາສາມັກຄີດ້ວຍຄວາມຈິງໃຈແລະບາກບັ່ນສູ້ຊົນຮ່ວມກັນ, ກໍບໍ່ມີອິດທິກຳລັງໃດໆທີ່ສາມາດຂັດຂວາງບາດກ້າວຂອງປະຊາຊົນຈີນໃນການບັນລຸຄວາມໃຝ່ຝັນຂອງຕົນ!"
