ກອງປະຊຸມລັດຖະມົນຕີການເງິນແລະຜູ້ວ່າການທະນາຄານກາງຂອງກຸ່ມ 20 ປະເທດຫຼື G20 ໄດ້ຈັດຂຶ້ນຢູ່ນະຄອນຫຼວງບູນົສໄອເຣັດສ໌ປະເທດອາກຊັງຕິນໃນວັນທີ 19 ມີນານີ້, ໂດຍບັນດາຜູ້ແທນໄດ້ຄົ້ນຄວ້າປຶກສາຫາລືກ່ຽວກັບຫົວຂໍ້ຕ່າງໆເຊັ່ນ: ການລົງທຶນພື້ນຖານໂຄງລ່າງ, ສະພາບການຫາວຽກເຮັດງານທຳໃນອະນາຄົດ, ເງິນຕາດີຈີຕອນແລະອື່ນໆ.
ໃນວັນດຽວກັນ, ທ່ານນິໂກລັສ ດຸຈົຟ ລັດຖະມົນຕີກະຊວງການເງິນອາກຊັງຕິນເຊິ່ງເປັນປະເທດປະທານໝູນວຽນຂອງກຸ່ມ 20 ປະເທດກ່າວໃນພິທີຖະແຫຼງຂ່າວທີ່ຈັດຂຶ້ນໃນວັນໄຂປະຊຸມວ່າ, ບັດດາຝ່າຍຢາກກ້າວໄປເຖິງຄວາມເປັນເອກະພາບຈະບໍ່ແມ່ນເລື່ອງງ່າຍ, ແຕ່ວ່າການສະເໜີແຜນການປະຕິຮູບທີ່ສາມາດຊຸກຍູ້ໃຫ້ເສດຖະກິດເຕີບໂຕແບບກວມລວມແມ່ນເລື່ອງຈຳເປັນທີ່ສຸດ.
ທ່ານດຸຈົຟ ກ່າວຕື່ມວ່າ, ປະເທດຕົນຫວັງວ່າຈະສ້າງຕຳແໜ່ງວຽກເຮັດງານທຳໃຫ້ໄດ້ຫຼາຍກວ່າເກົ່າແລະດີກວ່າເກົ່າໂດຍຜ່ານເສດຖະກິດເຕີບໂຕແບບຍືນຍົງແລະກວມລວມ, ສະນັ້ນປະເທດຕົນຈຶ່ງໄດ້ສະເໜີແຜນການປະຕິຮູບທີ່ກ່ຽວຂ້ອງ.
 |
