ວັນທີ 20 ມີນານີ້, ກອງປະຊຸມເທື່ອທີ 37 ຂອງສະພາມົນຕີສິດທິມະນຸດອົງການສະຫະປະຊາຊາດທີ່ຈັດຂຶ້ນຢູ່ເຊີແນວ ປະເທດສວິສໄດ້ຈັດການອະພິປາຍທົ່ວໄປກ່ຽວກັບສະພາບສິດທິມະນຸດຢູ່ດິນແດນທີ່ຖືກຍຶດຄອງຂອງປາເລັສຕິນແລະປະເທດອາຣັບອື່ນໆ, ຜູ້ແທນປະເທດທີ່ເຂົ້າຮ່ວມກອງປະຊຸມໄດ້ສະແດງຄວາມເປັນຫ່ວງຕໍ່ສະພາບສິດທິມະນຸດຢູ່ດິນແດນທີ່ຖືກອິສຣາແອນຍຶດຄອງນັ້ນສືບຕໍ່ຮ້າຍແຮງຂຶ້ນ ພ້ອມທັງຮຽກຮ້ອງໃຫ້ສະພາມົນຕີສິດທິມະນຸດອົງການສະຫະປະຊາຊາດສືບຕໍ່ຕິດຕາມສະພາບສິດທິມະນຸດຂອງດິນແດນທີ່ຖືກຍຶດຄອງດັ່ງກ່າວ ແລະຄັດຄ້ານການປ່ຽນແປງຄວາມຮັບຮູ້ທີ່ເປັນເອກະພາບຍາວນານກ່ຽວກັບຖານະຂອງເຢລູຊາແລັມ.
ໃນກອງປະຊຸມດັ່ງກ່າວ, ກ່ອນອື່ນ,ທ່ານເກັດ ກິວໂມ ຮອງຂ້າຫຼວງໃຫຍ່ວຽກງານສິດທິມະນຸດອົງການສະຫະປະຊາຊາດໄດ້ນຳສະເໜີບົດລາຍງານ 6 ສະບັບກ່ຽວກັບສະພາບສິດທິມະນຸດຢູ່ດິນແດນປາແລັສຕິນ ແລະດິນແດນປະເທດອາຣັບອື່ນໆທີ່ຖືກຍຶດຄອງ ເຊິ່ງບົດລາຍງານເຫຼົ່ານີ້ໄດ້ເຈາະຈົງຍົກໃຫ້ເຫັນສະພາບຫຼ້າສຸດກ່ຽວກັບອິສຣາແອນລະເມີດກົດໝາຍວ່າດ້ວຍມະນຸດສະທຳສາກົນແລະກົດໝາຍສິດທິມະນຸດສາກົນ ເຊິ່ງລວມທັງການສືບຕໍ່ກັກຕົວຊາວປາແລັສຕິນຕາມລຳພັງໃຈ, ຂະຫຍາຍສ້າງຈຸດຕັ້ງຖິ່ນຖານຊາວຢິວແລະອື່ນໆ.
ດັ່ງທີ່ເຮັດຄືຜ່ານມາ, ອິສຣາແອນປະຕິເສດເຂົ້າຮ່ວມການຫາລືກ່ຽວກັບບັນຫາດັ່ງກ່າວຂອງສະພາມົນຕີສິດທິມະນຸດອົງການສະຫະປະຊາຊາດ.
ໂອກາດປະກອບຄຳເຫັນ, ຜູ້ຕາງໜ້າປະແລັສຕິນໃນຖານະເປັນປະເທດກ່ຽວຂ້ອງໄດ້ກ່າວປະນາມອິສຣາແອນທີ່ໄດ້ໃຊ້ການເຄື່ອນໄຫວທາງການທະຫານຕໍ່ປາແລັສຕິນທີ່ຮຸນແຮງຂຶ້ນຢ່າງບໍ່ຢຸດຢັ້ງ ທັງຮຽກຮ້ອງໃຫ້ປະຊາຄົມໂລກໃຊ້ມາດຕະການເຂັ້ມງວດເພື່ອບັງຄັບໃຫ້ອິສຣາແອນຢຸດຕິການຂະຫຍາຍຈຸດຕັ້ງຖິ່ນຖານທີ່ຜິດກົດໝາຍ ແລະຮຽກຮ້ອງໃຫ້ອິສຣາແອນຮ່ວມມືກັບກົນໄກສິດທິມະນຸດສາກົນແລະເຄົາລົບໃນການປະຕິບັດຕາມສັນຍາສາກົນທີ່ກ່ຽວຂ້ອງ.