ຫວ່າງມໍ່ໆມານີ້, ທ່ານ ສົມຄິດ ຈະຕຸສີພິທັກ ຮອງນາຍົກລັດຖະມົນຕີໄທກ່າວວ່າ: ລັດຖະບານໄທພວມອອກແຮງຊຸກຍູ້ໂຄງການເສດຖະກິດດີຈີຕອນ ເພື່ອດຶງດູດການລົງທຶນດ້ານອຸດສາຫະກຳເຕັກນິກວິທະຍາສາດທີ່ກ້າວໜ້າ ແລະຊຸກຍູ້ການພັດທະນາຂະແໜງການທີ່ຈະເລີນໃໝ່ທີ່ນຳໃຊ້ເຕັກນິກເປັນຫຼັກ.
ທ່ານ ສົມຄິດ ກ່າວໃນກອງປະຊຸມສຳມະນາກ່ຽວກັບນະໂຍບາຍການລົງທຶນວ່າ: ລັດຖະບານໄທໄດ້ເລີ່ມຕິດຕັ້ງສາຍໃຍແກ້ວພື້ນທະເລ ເພື່ອໃຫ້ປະເທດຕົນກາຍເປັນປະຕູເຄືອຂ່າຍອິນເຕີເນັດຂອງພາກພື້ນອາຊີຕາເວັນອອກສຽງໃຕ້. ຂະນະດຽວກັນ,ລັດຖະບານກໍ່ໄດ້ສຸມໃສ່ສ້າງແລວເສດຖະກິດແບບມີການປະດິດສ້າງໃໝ່ຢູ່ເຂດແລວເສດຖະກິດພາກຕາເວັນອອກ.
ຂ່າວແຈ້ງວ່າ: ລັດຖະບານໄທໄດ້ວາງມາດຕະການຕ່າງໆເພື່ອດຶງດູດການລົງທຶນແລະບຸກຄະລາກອນ ເຊິ່ງລວມທັງການຍົກເວັ້ນພາສີຂອງວິສາຫະກິດ 10 ປີ, ແກ່ຍາວອາຍຸວີຊາຂອງນັກວິຊາການເຕັກນິກກໍ່ຄືນັກລົງທຶນ,ສົ່ງເສີມການສ້າງອົງການສຶກສາຢູ່ເຂດແລວເສດຖະກິດແລະອື່ນໆ.
 |
