ອົງການພັດທະນາແລະການຮ່ວມມືເສດຖະກິດຫຼື OECD ເປີດເຜີຍບົດລາຍງານປະຈຳປີໃນວັນທີ 19 ມີນານີ້, ໂດຍຮຽກຮ້ອງໃຫ້ປະເທດຕ່າງໆຈົ່ງເລັ່ງລັດການປະຕິຮູບແບບໂຄງປະກອບ, ເພື່ອຮັກສາການເຕີບໂຕທີ່ແຂງແຮງ, ສີຂຽວແລະມີລັກສະນະກວມລວມກວ່າເກົ່າ.
ບົດລາຍງານສະບັບດັ່ງກ່າວທີ່ OECD ເປີດເຜີຍໃນໄລຍະຈັດກອງປະຊຸມລັດຖະມົນຕີການເງິນແລະຜູ້ວ່າການທະນາຄານກາງຂອງກຸ່ມ 20 ປະເທດຫຼື G20 ລະບຸວ່າ, ບາດກ້າວການປະຕິຮູບຂອງໂລກໄດ້ຊ້າລົງຕື່ມອີກໃນປີ 2017, ທີ່ຈິງແລ້ວກ່ອນໜ້ານີ້ສອງປີກໍເລີ່ມຊ້າລົງ, ແຕ່ກໍບໍ່ມີທ່າທີສະແດງໃຫ້ເຫັນວ່າຈະໄວຂຶ້ນຄືນໃໝ່.
ທ່ານແອນເເກວ ກຸເຣຍ, ເລຂາທິການໃຫຍ່ອົງການພັດທະນາແລະການຮ່ວມມືເສດຖະກິດກ່າວວ່າ, ຢາກຮັກສາເສດຖະກິດໂລກໃຫ້ເຕີບໂຕຢ່າງຕໍ່ເນື່ອງ, ຕ້ອງມີຍຸດທະສາດໃນການປະຕິຮູບໂຄງປະກອບແລະຄວາມປາດຖະໜາດ້ານການເມືອງທີ່ປະຕິບັດຍຸດທະສາດດັ່ງກ່າວຢ່າງຕໍ່ເນື່ອງ.
ບົດລາຍງານຍັງສະເໜີຂໍ້ລິເລີ່ມການປະຕິຮູບຕໍ່ລັດຖະບານປະເທດຕ່າງໆ, ທີ່ກ່ຽວພັນເຖິງຂົງເຂດການຕິດຕາມຄຸ້ມຄອງຜະລິດຕະພັນແລະຕະຫຼາດແຮງງານ, ການສຶກສາອົບຮົມ, ລະບົບເກັບພາສີແລະຊຳລະບັນຊີ, ກົດລະບຽບການລົງທຶນການຄ້າແລະອື່ນໆ.
 |
