ວັນທີ 20 ມີນານີ້, ທ່ານ ສີຈິ້ນຜິງ ປະທານປະເທດຈີນໄດ້ສົນທະນາກັບທ່ານ ນາເຣນດຣາ ໂມດີ ນາຍົກລັດຖະມົນຕີອິນເດຍຜ່ານທາງໂທລະສັບ.
ໂອກາດດັ່ງກ່າວ, ທ່ານ ໂມດີ ໄດ້ສະແດງຄວາມຊົມເຊີຍຢ່າງອົບອຸ່ນອີກເທື່ອໜຶ່ງຕໍ່ທ່ານ ສີຈິ້ນຜິງ ທີ່ໄດ້ຮັບເລືອກຕັ້ງເປັນປະທານປະເທດຈີນອີກວາລະໜຶ່ງ. ທ່ານກ່າວວ່າ, ການໄດ້ຮັບເລືອກຕັ້ງຂອງທ່ານໄດ້ພິສູດອີກເທື່ອໜຶ່ງໃຫ້ເຫັນເຖິງການສະໜັບສະໜູນຂອງປະຊາຊົນຈີນຕໍ່ທ່ານ. ອິນເດຍແລະຈີນ ລ້ວນແຕ່ແມ່ນປະເທດອາລະຍະທຳບູຮານແລະເປັນປະເທດທີ່ມີອິດທິພົນໃນໂລກ, ອິນເດຍຍິນດີຮັດແໜ້ນການໄປມາຫາສູ່ກັນລະດັບສູງກັບຈີນ, ລົງເລິກສາຍພົວພັນສອງຝ່າຍ, ເພີ່ມທະວີການປະສານງານແລະການຮ່ວມມືໃນວຽກງານສາກົນ, ຊຸກຍູ້ສາຍພົວພັນຄູ່ຮ່ວມທີ່ແໜ້ນແຟ້ນກວ່າເກົ່າລະຫວ່າງອິນເດຍ-ຈີນໃຫ້ໄດ້ຮັບຄວາມຄືບໜ້າໃຫຍ່ຫຼວງກວ່າເກົ່າ, ຊຸກຍູ້ສັນຕິພາບແລະການພັດທະນາຂອງໂລກກໍຄືພາກພື້ນ.
ທ່ານ ສີຈິ້ນຜິງ ໄດ້ສະແດງຄວາມຂອບໃຈທ່ານ ໂມດີ ທີ່ສົ່ງໂທລະເລກຊົມເຊີຍ, ທັງກ່າວເນັ້ນວ່າ, ຈີນແລະອິນເດຍ ລ້ວນແຕ່ແມ່ນປະເທດໃຫຍ່ທີ່ພວມພັດທະນາ ແລະເປັນປະເທດຕະຫຼາດຈະເລີນໃໝ່ຕົ້ນຕໍ, ແມ່ນກຳລັງສຳຄັນໃນການຊຸກຍູ້ໃຫ້ໂລກຫັນເປັນຫຼາຍຂົ້ວແລະເສດຖະກິດໂລກາພິວັດ. ຂ້າພະເຈົ້າຍິນດີເພີ່ມທະວີການແລກປ່ຽນກັບທ່ານນາຍົກລັດຖະມົນຕີກ່ຽວກັບບັນຫາລວມ, ຍາວນານແລະຍຸດທະສາດໃນສາຍພົວພັນສອງປະເທດພ້ອມດ້ວຍສະຖານະການສາກົນແລະພາກພື້ນ ເພື່ອເພີ່ມຄວາມໄວ້ເນື້ອເຊື່ອໃຈດ້ານການເມືອງລະຫວ່າງສອງປະເທດ, ໃຫ້ການຊີ້ນຳທີ່ສຳຄັນແກ່ການພັດທະນາສາຍພົວພັນສອງປະເທດ ແລະຍົກລະດັບການພັດທະນາສາຍພົວພັນສອງປະເທດໃຫ້ສູງຂຶ້ນຢ່າງບໍ່ຢຸດຢັ້ງ.
 |
