ການພົບປະເຈລະຈາບໍ່ເປັນທາງການລະຫວ່າງ ສປປ ເກົາຫຼີ, ສ.ເກົາຫຼີ ແລະ ອາເມລິກາໄດ້ຈັດຂຶ້ນຢູ່ເມືອງວານຕາທາງພາກໃຕ້ປະເທດແຟງລັງໃນວັນທີ 20 ຫາວັນທີ 21 ມີນານີ້ ໂດຍຜູ້ຕາງໜ້າສາມຝ່າຍໄດ້ແລກປ່ຽນຄວາມຄິດຄວາມເຫັນກ່ຽວກັບສະຖານະການຂອງແຫຼມເກົາຫຼີ ກໍໍ່ຄືບັນຫາອື່ນໆທີ່ສົນໃຈຮ່ວມກັນ.
ຫຼັງຈາກສິ້ນສຸດການພົບປະ, ວັນທີ 21 ມີນານີ້ ຢູ່ນອກສະຖານທີ່ຈັດກອງປະຊຸມ, ທ່ານ ກິມໂມ ລາດີເວີຕາ ເຈົ້າໜ້າທີ່ກະຊວງການຕ່າງປະເທດແຟງລັງໄດ້ຕາງໜ້າສາມຝ່າຍອ່ານຖະແຫຼງການສະບັບໜຶ່ງຕໍ່ໜ້າສື່ມວນຊົນ.
ຖະແຫຼງການກ່າວເນັ້ນວ່າ,ກອງປະຊຸມຄັ້ງນີ້ແມ່ນ "ໜຶ່ງໃນກອງປະຊຸມວິຊາການຕ່າງໆເພື່ອຄົ້ນຄວ້າແລະປຶກສາຫາລືກ່ຽວກັບການສ້າງຄວາມໝັ້ນໃຈແລະຜ່ອນຄາຍສະຖານະການຂອງແຫຼມເກົາຫຼີໃນຫຼາຍປີຜ່ານມາ", ແລະ"ໄດ້ກຽມພ້ອມເປັນຢ່າງດີແລ້ວກ່ອນສະຖານະການແຫຼມເກົາຫຼີມີການປ່ຽນແປງດີຂຶ້ນ".
ຖະແຫຼງການເນັ້ນຕື່ມວ່າ: ຜູ້ຕາງໜ້າທັງສາມຝ່າຍໄດ້ແລກປ່ຽນຄວາມຄິດຄວາມເຫັນຢ່າງມີລັກສະນະສ້າງສັນພາຍໃຕ້ບັນຍາກາດທີ່ຕັ້ງໜ້າ.
ແຕ່ຖະແຫຼງການບໍ່ໄດ້ກ່າວເຖິງລາຍລະອຽດຂອງກອງປະຊຸມຄັ້ງນີ້ແຕ່ຢ່າງໃດ.
