ເນື່ອງໃນໂອກາດກອງປະຊຸມສະພາປະຊາຊົນແຫ່ງຊາດຈີນແລະກອງປະຊຸມສະພາປຶກສາການເມືອງປະຊາຊົນແຫ່ງຊາດຈີນ 2018 ຈັດຂຶ້ນໃນຫວ່າງກ່ອນນີ້ບໍ່ດົນ, ທ່ານຕິດລິນອົງ ເອກອັກຄະລັດຖະທູດມຽນມາປະຈຳຈີນໄດ້ໃຫ້ສຳພາດຕໍ່ນັກຂ່າວ CRI ວ່າ: ກອງປະຊຸມສອງສະພາເທື່ອນີ້ໄດ້ສ້າງພື້ນຖານລະບອບທີ່ໜັກແໜ້ນໃຫ້ແກ່ການພັດທະນາຢ່າງໝັ້ນທ່ຽງຍາວນານແລະເພີ່ມຄວາມສາມັກຄີແກນກາງຂອງຈີນ.
ທ່ານເອກອັກຄະລັດຖະທູດຕິນລິນອົງໄດ້ຕີລາຄາສູງຕໍ່ກອງປະຊຸມສອງສະພາຄັ້ງນີ້ທີ່ໄດ້ຄົ້ນຄວ້າພິຈາລະນາແລະຮັບຮອງເອົາລັດຖະທຳມະນູນສະບັບປັບປຸງ. ທ່ານກ່າວວ່າ:"ການປັບປຸງລັດຖະທຳມະນູນເທື່ອນີ້ໄດ້ຈັດເອົາແນວຄິດສີຈິ້ນຜິງກ່ຽວກັບສັງຄົມນິຍົມທີ່ມີສີສັນພິເສດຂອງຈີນໃນຍຸກໃໝ່ບັນທຶກເຂົ້າໃນລັດຖະທຳມະນູນ ເຊິ່ງເປັນໝາກຜົນສຳຄັນຂອງການປັບປຸງລັດຖະທຳມະນູນເທື່ອນີ້ ໂດຍໄດ້ຍຶດໝັ້ນແລະເພີ່ມທະວີຖານະການນຳພາຮອບດ້ານຂອງພັກກອມມູນິດຈີນ. ຜ່ານຈາກການປັບປຸງລັດຖະທຳມະນູນເທື່ອນີ້, ຂ້າພະເຈົ້າເຊື່ອໝັ້ນວ່າພາຍໃຕ້ການນຳພາຂອງພັກກອມມູນິດຈີນທີ່ມີທ່ານສີຈິ້ນຜິງເປັນແກນນຳ, ຈີນຈະສືບຕໍ່ເດີນຕາມເສັ້ນທາງສັງຄົມນິຍົມຢ່າງເດັດດ່ຽວໜຽວແໜ້ນ ແລະມຸ່ງໜ້າໄປສູ່ເປົ້າໝາຍສູ້ຊົນ 100 ປີ 2 ເຫດການທີ່ຫັນໜ້າສູ່ອະນາຄົດດ້ວຍບາດກ້າວທີ່ໜັກແໜ້ນ."
ທ່ານເອກອັກຄະລັດຖະທູດຕິນລິນອົງໄດ້ສະແດງຄວາມຊົມເຊີຍຢ່າງສຸດໃຈຕໍ່ທ່ານສີຈິ້ນຜິງທີ່ໄດ້ຮັບເລືອກຕັ້ງເປັນປະທານປະເທດຈີນອີກວາລະໜຶ່ງ, ທ່ານກ່າວວ່າ: ນີ້ບໍ່ພຽງແຕ່ໄດ້ຮັບການສະໜັບສະໜູນຢ່າງກວ້າງຂວາງຈາກປະຊາຊົນຈີນເທົ່ານັ້ນ, ຕົນຕາງໜ້າລັດຖະບານແລະປະຊາຊົນມຽນມາກໍສະໜັບສະໜູນທີ່ສຸດເຊັ່ນກັນ. ຂໍ້ລິເລີ່ມຕ່າງໆທີ່ສະເໜີໂດຍທ່ານປະທານສີຈິ້ນຜິງເຊັ່ນ "ໜຶ່ງແລວໜຶ່ງເສັ້ນທາງ","ປະຊາຄົມຮ່ວມຊາຕາກຳມວນມະນຸດ"ແລະອື່ນໆ ເຮັດໃຫ້ປະເທດອ້ອມຂ້າງເຊິ່ງລວມທັງມຽນມາໄດ້ຮັບຜົນປະໂຫຍດຕົວຈິງຈາກການຮ່ວມມືແລະແລກປ່ຽນກັນ ແລະປະເທດເຫຼົ່ານີ້ກໍມີຄວາມໝັ້ນໃຈຢ່າງເຕັມປ່ຽມຕໍ່ອະນາຄົດອີກດ້ວຍ.
 |
