ຫວ່າງມໍ່ໆມານີ້, ຜູ້ນຳແລະຫົວໜ້າພັກການເມືອງຕ່າງໆຂອງບາງປະເທດໄດ້ສົ່ງໂທລະເລກແລະຈົດໝາຍໄປຍັງທ່ານ ສີຈິ້ນຜິງ ເພື່ອສະແດງຄວາມຊົມເຊີຍຕໍ່ທ່ານທີ່ໄດ້ຮັບເລືອກຕັ້ງເປັນປະທານປະເທດສາທາລະນະລັດປະຊາຊົນຈີນ.
ເນື້ອໃນໂທລະເລກຂອງທ່ານ ແຟຼງ ວອນເຕີ ສເຕັນເມເອີ ປະທານາທິບໍດີເຢຍລະມັນລະບຸວ່າ: ຂ້າພະເຈົ້າຂໍສະແດງຄວາມຊົມເຊີຍແລະອວຍພອນຢ່າງສຸດອົກສຸດໃຈຕໍ່ທ່ານທີ່ໄດ້ຮັບເລືອກຕັ້ງເປັນປະທານປະເທດຈີນໃນກອງປະຊຸມຄັ້ງທີ 1 ຂອງສະພາປະຊາຊົນແຫ່ງຊາດຈີນສະໄໝທີ 13. ຂ້າພະເຈົ້າຍິນດີຮ່ວມກັບທ່ານຮ່ວມກັນຊຸກຍູ້ສາຍພົວພັນທີ່ແໜ້ນແຟ້ນແລະມີໄມຕີຈິດມິດຕະພາບລະຫວ່າງເຢຍລະມັນ-ຈີນ.
ທ່ານນາງ ແອງເຈີລາ ເມີເຄວ ນາຍົກລັດຖະມົນຕີເຢຍລະມັນກ່າວໃນໂທລະເລກວ່າ: ໃນຊຸມປີຜ່ານມາ, ການພົວພັນຄູ່ຮ່ວມຍຸດທະສາດຮອບດ້ານລະຫວ່າງເຢຍລະມັນ-ຈີນໄດ້ສ້າງຂອບທີ່ໝັ້ນທ່ຽງໃຫ້ແກ່ການຮ່ວມມືລະຫວ່າງສອງປະເທດໃນຂົງເຂດຕ່າງໆ. ຂ້າພະເຈົ້າຍິນດີຮ່ວມກັບທ່ານສືບຕໍ່ລົງເລິກການຮ່ວມມື, ຊຸກຍູ້ການພົວພັນຄູ່ຮ່ວມຍຸດທະສາດຮອບດ້ານລະຫວ່າງສອງປະເທດໃຫ້ໄດ້ຮັບການພັດທະນາທີ່ໃຫຍ່ຫຼວງກວ່າເກົ່າ. ຂໍສະແດງຄວາມຍິນດີແລະຊົມເຊີຍຂໍໃຫ້ທ່ານຈົ່ງໄດ້ຮັບຜົນສຳເລັດຕໍ່ໄປໃນຖານະດຳລົງຕຳແໜ່ງປະທານປະເທດຈີນ.
ທ່ານ ຊາວລີ ໄວນາໂມ ນິນິສໂຕ ປະທານາທິບໍດີແຟງລັງກ່າວວ່າ: ໃນເດືອນເມສາປີ 2017, ທ່ານໄດ້ຢ້ຽມຢາມແຟງລັງທາງລັດຖະກິດ, ພວກເຮົາໄດ້ວາງແຜນການຮ່ວມມືລະຫວ່າງສອງຝ່າຍໃນຂົງເຂດທີ່ກວ້າງຂວາງຢ່າງຮອບດ້ານ. ປັດຈຸບັນ,ສອງຝ່າຍພວມປຶກສາຫາລືກ່ຽວກັບການຊຸກຍູ້ແຜນການວຽກງານການພົວພັນຄູ່ຮ່ວມມືແບບໃໝ່ລະຫວ່າງສອງຝ່າຍທີ່ອວ່າຍໜ້າໄປສູ່ອະນາຄົດ. ເຊື່ອວ່າແຜນການດັ່ງກ່າວຈະຊີ້ແຈ້ງທິດທາງໃຫ້ແກ່ການຮ່ວມມືທີ່ແທ້ຈິງລະຫວ່າງສອງປະເທດ,ຊຸກຍູ້ການຮ່ວມມືລະຫວ່າງສອງຝ່າຍໃຫ້ໄດ້ຮັບໝາກຜົນອັນອຸດົມສົມບູນ.
ນອກຈາກນີ້, ພາລາຊະນີ ມາກາເລັທທີ ສອງ ຂອງດານມາກ, ທ່ານ ເອັນຣິກ ເປນາ ນີໂຕ ປະທານາທິບໍດີແມັກຊິກ ແລະທ່ານ ຟີລິບ ອູຈາໂນວິກ ປະທານາທິບໍດີມອນຕີນີໂກຣກໍ່ໄດ້ສົ່ງໂທລະເລກຫຼືຈົດໝາຍໄປຍັງທ່ານປະທານ ສີຈິ້ນຜິງເຊັ່ນດຽວກັນ.
 |
