ວັນທີ 22 ມີນານີ້, ທ່ານ ທານິນ ສົມບູນ ຫົວໜ້າກົມທາງຫຼວງກະຊວງຄົມມະນາຄົມໄທກ່າວຢູ່ສະຖານທີ່ກໍ່ສ້າງໂຄງການຮ່ວມມືທາງລົດໄຟຈີນ-ໄທທີ່ເມືອງປາກຊ່ອງແຂວງນະຄອນ ລາດຊະສີມາຂອງປະເທດໄທວ່າ: ປັດຈຸບັນ, ວິສະວະກຳໂຍທາໄລຍະທຳອິດຂອງໂຄງການດັ່ງກ່າວຄືບໜ້າເປັນຢ່າງດີແລະໄດ້ຮັບບົດຮຽນສຳເລັດຜົນທີ່ກ່ຽວຂ້ອງ ໂດຍຈະໃຊ້ໃນການກໍ່ສ້າງທາງລົດໄຟໄລຍະອື່ນ.
ໃນມື້ດັ່ງກ່າວ, ກົມທາງຫຼວງກະຊວງຄົມມະນາຄົມໄທໄດ້ຈັດຕັ້ງສື່ມວນຊົນໄປທັດສະນະເບິ່ງວຽກງານການກໍ່ສ້າງທາງລົດໄຟຄວາມໄວສູງບາງກອກ-ນະຄອນ ລາດຊະສີມາ ເຊິ່ງເປັນໂຄງການໄລຍະທຳອິດຂອງໂຄງການຮ່ວມມືທາງລົດໄຟຈີນ-ໄທ. ທ່ານ ທານິນ ກ່າວຕໍ່ສື່ມວນຊົນວ່າ: "ວຽກງານປັບໜ້າດິນທີ່ຍາວ 3 ກິໂລແມັດໃຫ້ຮາບພຽງດີໃນໄລຍະທາງ 3,5 ກິໂລແມັດທີ່ເປັນໄລຍະທຳອິດຂອງໂຄງການດັ່ງກ່າວນັ້ນໄດ້ສຳເລັດແລ້ວ". ແລະວຽກງານໂຍທາສຳເລັດປະມານ 7%, ພາຍໃຕ້ເງື່ອນໄຂທີ່ມີງົບປະມານພຽງພໍ, ກົມທາງຫຼວງຈຶ່ງມີຄວາມໝັ້ນໃຈວ່າຈະສຳເລັດວຽກງານໂຍທາຂອງໂຄງການພາຍໃນ 4 ເດືອນ.
ພິທີເລີ່ມກໍ່ສ້າງທາງລົດໄຟຄວາມໄວສູງບາງກອກ-ນະຄອນ ລາດຊະສີມາໄລຍະທຳອິດໄດ້ຈັດຂຶ້ນຢູ່ເມືອງປາກຊ່ອງ ແຂວງນະຄອນ ລາດຊະສີມາປະເທດໄທໃນວັນທີ 21 ທັນວາປີ 2017. ຄວາມຍາວຂອງທາງລົດໄຟມີປະມານ 253 ກິໂລແມັດ, ຄວາມໄວໃນການແລ່ນລົດສູງສຸດແມ່ນ 250 ກິໂລແມັດຕໍ່ຊົ່ວໂມງ, ມີ 6 ສະຖານີ, ໂດຍການນຳໃຊ້ເຕັກນິກທາງລົດໄຟຄວາມໄວສູງຂອງຈີນ, ຫຼັງຈາກສ້າງສຳເລັດແລ້ວຈະກາຍເປັນທາງລົດໄຟຄວາມໄວສູງເສັ້ນທຳອິດຂອງໄທ.
 |
