ວັນທີ 22 ມີນານີ້, ທຳນຽບປະທານາທິບໍດີມານດິຟໄດ້ອອກຖະແຫຼງການວ່າ: ເຖິງວ່າປະເທດຕົນໄດ້ຜະເຊີນກັບການຂົ່ມຂູ່ດ້ານຄວາມໝັ້ນຄົງໃນລະດັບໃດໜຶ່ງກໍ່ຕາມ, ແຕ່ປັດຈຸບັນ ສະຖານະການຕ່າງໆພາຍໃນປະເທດໄດ້ເຂົ້າສູ່ສະພາບປົກກະຕິແລ້ວ. ພາຍໃຕ້ຂໍ້ສະເໜີຈາກພາກສ່ວນຮັກສາຄວາມໝັ້ນຄົງ, ທ່ານ ອັບດຸນລາ ຢາເມັນ ປະທານາທິບໍດີມານດິຟຈຶ່ງໄດ້ປະກາດຍົກເລີກພາວະສຸກເສີນໃນທົ່ວປະເທດໃນມື້ດັ່ງກ່າວ.
ໃນວັນທີ 1 ກຸມພາຜ່ານມາ, ສານສູງສຸດຂອງມານດິຟໄດ້ອອກຄຳສັ່ງ ຢ່າງກະທັນຫັນ ໂດຍຮຽກຮ້ອງໃຫ້ປ່ອຍຕົວຜູ້ນຳພັກຝ່າຍຄ້ານ 9 ຄົນເຊິ່ງລວມທັງທ່ານ ໂມຮາເມັດ ນາຊິດ ອະດີດປະທານາທິບໍດີໂດຍບໍ່ໄດ້ຮັບໂທດແຕ່ຢ່າງໃດ. ວັນທີ 4 ເດືອນດຽວກັນ, ສານສູງສຸດມານດິຟໄດ້ອອກຄຳຕັດສິນອີກເທື່ອໜຶ່ງ ໂດຍລະບຸວ່າຍ້ອນທ່ານ ຢາເມັນ ປະຕິເສດການປ່ອຍຕົວຜູ້ນຳພັກຝ່າຍຄ້ານ ສະນັ້ນຈະຖອດຖອນປະທານາທິບໍດີຢາເມັນອອກຈາກຕຳແໜ່ງ. ຫຼັງຈາກນັ້ນ,ໃນຕອນຄ່ຳວັນທີ 5 ກຸມພາຜ່ານມາ, ທ່ານ ຢາເມັນຈຶ່ງໄດ້ປະກາດພາວະສຸກເສີນໃນຂອບເຂດທົ່ວປະເທດເປັນເວລາ 15 ວັນ.
 |
