ວັນທີ 22 ມີນານີ້, ທ່ານສີຈິ້ນຜິງ ປະທານປະເທດຈີນໄດ້ສົນທະນາຜ່ານທາງໂທລະສັບກັບທ່ານທາຄຼົງ ປະທານາທິບໍດີຝຣັ່ງ.
ທ່ານມາຄຼົງໄດ້ສະແດງຄວາມຊົມເຊີຍມາຍັງທ່ານສີຈິ້ນຜິງທີ່ໄດ້ຮັບເລືອກຕັ້ງເປັນປະທານປະເທດຈີນອີກວາລະໜຶ່ງ ແລະກ່າວວ່າ: ຂ້າພະເຈົ້າຫວງແຫນໄມຕີຈິດມິດຕະພາບລະຫວ່າງປະເທດຕົນ ແລະຈີນ, ເອົາໃຈໃສ່ເປັນຢ່າງສູງຕໍ່ໝາກຜົນຕ່າງໆທີ່ບັນລຸໄດ້ໃນກອງປະຊຸມສອງສະພາທົ່ວປະເທດຈີນ ແລະຍິນດີພະຍາຍາມຮ່ວມກັບທ່ານສີຈິ້ນຜິງ ປະທານປະເທດຈີນ, ຈັດຕັ້ງປະຕິບັດຄວາມເຫັນທີ່ເປັນເອກະພາບທີ່ສຳຄັນໃນການລົງເລິກສາຍພົວພັນຝຣັ່ງ-ຈີນ. ການນຳຂັ້ນສູງລະຫວ່າງສອງຝ່າຍຄວນໄປມາຫາສູ່ກັນຢ່າງແໜ້ນແຟ້ນຍິ່ງໆຂຶ້ນ, ລົງເລິກການຮ່ວມມືທາງດ້ານເສດຖະກິດ-ການຄ້າ, ການລົງທຶນ, ກະສິກຳ, ພະລັງງານນິວເຄລຍ, ສິ່ງແວດລ້ອມ ແລະອື່ນໆ, ເພີ່ມທະວີການແລກປ່ຽນ ແລະປະສານງານໃນບັນຫາໂລກາພິວັດ ເຊັ່ນ: ການຮັບມືກັບການປ່ຽນແປງດິນຟ້າອາກາດ, ຮັກສາລະບົບການຄ້າຫຼາຍຝ່າຍ, ປ້ອງກັນຄວາມສ່ຽງການທະນາຄານ ແລະອື່ນໆ.
ທ່ານສີຈິ້ນຜິງກ່າວວ່າ: ປີນີ້ແມ່ນປີເປີດປະຕູສູ່ໂລກພາຍນອກຂອງຈີນຄົບຮອບ 40 ປີ. ກອງປະຊຸມສອງສະພາທົ່ວປະເທດຈີນທີ່ຫາກໍ່ສິ້ນສຸດລົງໃນມໍ່ໆນີ້ມີຄວາມສຳຄັນໃນການພັດທະນາປະເທດຕົນໃນອະນາຄົດ. ໃນໄລຍະຕໍ່ໜ້າ, ຈີນຈະສືບຕໍ່ລົງເລິກການປະຕິຮູບ, ເປີດກວ້າງການເປີດປະຕູສູ່ໂລກພາຍນອກ ເພື່ອບັນລຸການພັດທະນາໃຫຍ່ກວ່າເກົ່າ, ຂະນະດຽວກັນກໍ່ຈະປະກອບສ່ວນໃຫຍ່ຫຼວງກວ່າເກົ່າໃນໂລກ. ຈີນຍິນດີພະຍາຍາມຮ່ວມກັບປະເທດຝຣ່ັງ, ເພີ່ມທະວີການແລກປ່ຽນ ແລະປະສານສົມທົບດ້ານຍຸດທະສາດ, ສຸມໃສ່ຮັກສາ ແລະປັບປຸງລະບຽບການສາກົນ ແລະລະບົບການຄຸ້ມຄອງທົ່ວໂລກ, ຍຶດຖືລັດທິຫຼາຍຝ່າຍ, ສົ່ງເສີມການເປັນຫຼາຍຂົ້ວຂອງໂລກ, ຊຸກຍູ້ເສດຖະກິດໂລກາພະວັດ ແລະສ້າງລະບົບການຄ້າທົ່ວໂລກທີ່ເປີດປະຕູຮ່ວມກັນ.
 |
