ໃນກອງປະຊຸມສະພາການຄ້າສິນຄ້າຂອງອົງການການຄ້າໂລກຫຼື WTO ທີ່ຈັດຂຶ້ນໃນວັນທີ 23 ມີນານີ້, 40 ກວ່າສະມາຊິກ WTO ເຊິ່ງລວມທັງ 28 ສະມາຊິກຈາກສະຫະພາບເອີຣົບໄດ້ປະກອບຄຳເຫັນໂດຍກ່າວເຕືອນວ່າ: ອາເມລິກາເກັບພາສີສູງຕໍ່ເຫຼັກກ້າແລະອະລູມີນຽມທີ່ນຳເຂົ້ານັ້ນ ບໍ່ພຽງແຕ່ຈະກະທົບເຖິງຜົນປະໂຫຍດດ້ານການຄ້າຂອງນັກທຸລະກິດເທົ່ານັ້ນ, ຍັງຈະກະທົບເຖິງຄວາມໝັ້ນທ່ຽງຂອງລະບົບການຄ້າຫຼາຍຝ່າຍຂອງໂລກທີ່ສ້າງຂຶ້ນຢູ່ບົນພື້ນຖານກົດລະບຽບ.
WTO ໄດ້ອອກຖະແຫຼງການວ່າ: ຜູ້ຕາງໜ້າຂອງຈີນກ່າວວ່າ, ມາດຕະການດັ່ງກ່າວຂອງອາເມລິກາໄດ້ລະເມີດ"ສັນຍາລວມວ່າດ້ວຍພາສີແລະການຄ້າ"ແລະ"ສັນຍາວ່າດ້ວຍມາດຕະການຮັບປະກັນ"ຂອງ WTO. ຈີນຮຽກຮ້ອງໃຫ້ອາເມລິກາຢ່າໃຊ້ມາດຕະການແຕ່ຝ່າຍດຽວ, ເຄົາລົບກົດລະບຽບຂອງ WTO, ປົກປັກຮັກສາລະບົບການຄ້າຫຼາຍຝ່າຍ.
ຜູ້ຕາງໜ້າຂອງຣັດເຊຍກ່າວວ່າ: ມາດຕະການເກັບພາສີຂອງອາເມລິກາບໍ່ສອດຄ່ອງກັບຄຳໝັ້ນສັນຍາຂອງຕົນທີ່ໃຫ້ໄວ້ຕາມກົດລະບຽບຂອງ WTO, ຣັດເຊຍຫວັງວ່າຈະດຳເນີນການເຈລະຈາທີ່ມີລັກສະນະສ້າງສັນກັບອາເມລິກາກ່ຽວກັບເລື່ອງນີ້. ຜູ້ຕາງໜ້າຂອງຍີ່ປຸ່ນ ນິວຊີແລນ ອົສຕຼາລີ ອິນເດຍ ແລະປະເທດອື່ນໆກໍ່ໄດ້ສະແດງຄວາມສົນໃຈແລະຄວາມເປັນຫ່ວງຕໍ່ມາດຕະການໃໝ່ຂອງອາເມລິກາ ແລະຮຽກຮ້ອງໃຫ້ປົກປັກຮັກສາລະບົບການຄ້າຫຼາຍຝ່າຍ.
ທ່ານໂຣເປີໂຕ ອາເຊເວໂດ ຜູ້ອຳນວຍການໃຫຍ່ຂອງ WTO ກ່າວຄຳປາໄສວ່າ: ຫວັງວ່າບັນດາສະມາຊິກຂອງ WTO ສືບຕໍ່ແກ້ໄຂຄວາມເປັນຫ່ວງຂອງຕົນໂດຍຜ່ານກົນໄກ WTO, ຊອກຫາວິທີແກ້ໄຂທີ່ມີຄວາມອາດເປັນໄປໄດ້. ການກະທຳອື່ນໆທັງໝົດລ້ວນແຕ່ຈະເພີ່ມຄວາມສ່ຽງທີ່ເຮັດໃຫ້ການຕໍ່ຕ້ານກັນຮຸນແຮງຂຶ້ນຕື່ມຢ່າງຫຼວງຫຼາຍ, ໃນທີ່ສຸດຈະສ້າງຄວາມເສຍຫາຍໃຫ້ແກ່ທຸກຝ່າຍ.
 |
