ວັນທີ 23 ມີນານີ້, ຄະນະກຳມະການເລືອກຕັ້ງສູນກາງຣັດເຊຍໄດ້ເປີດເຜີຍຜົນສຸດທ້າຍຂອງການເລືອກຕັ້ງທົ່ວໄປປະເທດຕົນວ່າ ທ່ານວະລາດີເມຍ ປູຕິນ ປະທານາທິບໍດີຄົນປັດຈຸບັນໄດ້ຊະນະການເລືອກຕັ້ງທົ່ວໄປຄັ້ງນີ້ໂດຍໄດ້ບັດເຫັນດີ 76,69%, ປະຊາຊົນຜູ້ມີສິດເລືອກຕັ້ງຫຼາຍກວ່າ 56 ລ້ານຄົນໄດ້ປ່ອນບັດສະໜັບສະໜູນທ່ານປູຕິນ. ມື້ດຽວກັນ, ທ່ານປູຕິນໄດ້ກ່າວປາໄສທາງໂທລະພາບຕໍ່ປະຊາຊົນທົ່ວປະເທດວ່າ: ຣັດເຊຍຕ້ອງລົງເລິກການປະຕິຮູບເພື່ອຊຸກຍູ້ການພັດທະນາເສດຖະກິດ, ເພີ່ມຄວາມສົມບູນພູນສຸກໃຫ້ປະຊາຊົນ ທັງຮຽກຮ້ອງໃຫ້ປະຊາຊົນສາມັກຄີກັນເພື່ອບັນລຸຄວາມຈະເລີນຮຸ່ງເຮືອງຂອງປະເທດຊາດ.
ໂອກາດປາໄສທາງໂທລະພາບ, ທ່ານປູຕິນຍັງໄດ້ສະແດງຄວາມຂອບໃຈຕໍ່ປະຊາຊົນຜູ້ມີສິດເລືອກຕັ້ງທີ່ໄດ້ໃຫ້ການສະໜັບສະໜູນຢ່າງໃຫຍ່ຫຼວງແລະປະຊາຊົນຜູ້ມີສິດເລືອກຕັ້ງທຸກຄົນທີ່ມີຄວາມຫ້າວຫັນໃນການປ່ອນບັດເລືອກຕັ້ງ ແລະຂອບໃຈເຂົາເຈົ້າທີ່ໄດ້ສະແດງໃຫ້ເຫັນຈິດສຳນຶກພົນລະເມືອງ,ຄວາມຮັບຜິດຊອບແລະຄວາມສາມັກຄີໃນເວລາທີ່ປະເທດຕົນກຳລັງຜະເຊີນກັບສິ່ງທ້າທາຍ. ທ່ານປູຕິນຊີ້ໃຫ້ເຫັນວ່າ: ຄວາມເຊື່ອໝັ້ນຂອງປະຊາຊົນແມ່ນມີຂຶ້ນບົນພື້ນຖານຜົນງານຈຳນວນໜຶ່ງທີ່ຍາດມາໄດ້ແລ້ວ.
ຫຼັງການແຂ່ງຂັນເລືອກຕັ້ງປະທານາທິບໍດີ, ທ່ານປູຕິນໄດ້ກ່າວມາຫຼາຍເທື່ອວ່າ: ການປະດິດສ້າງເພື່ອພັດທະນາເສດຖະກິດ ແລະການເພີ່ມຄວາມສົມບູນພູນສຸກໃຫ້ແກ່ປະຊາຊົນເປັນໜ້າທີ່ສຳຄັນອັນດັບໜຶ່ງໃນອາຍຸການດຳລົງຕຳແໜ່ງວາລະຕໍ່ໜ້າຂອງຕົນ. ຕາມກົດໝາຍຣັດເຊຍ, ທ່ານປູຕິນຈະສາບານຕົວຂຶ້ນດຳລົງຕຳແໜ່ງປະທານາທິບໍດີໃນວັນທີ 7 ພຶດສະພາທີ່ຈະມາເຖິງນີ້, ຈາກນັ້ນ ຈະຕົກລົງຄະນະລັດຖະບານຣັດເຊຍຊຸດໃໝ່.
 |
