ວັນທີ 23 ມີນານີ້, ກຳປັ່ນຂັບໄລ່ດ້ວຍລູກສອນໄຟ "Mustin"ຂອງກອງທັບເຮືອອາເມລິກາໄດ້ເຂົ້າສູ່ເຂດເກາະຕ່າງໆຢູ່ທະເລຈີນໃຕ້ໂດຍບໍ່ໄດ້ຮັບການອະນຸຍາດ. ຕໍ່ກໍລະນີດັ່ງກ່າວ, ທ່ານເຢິນໂກສຽງ ໂຄສົກກະຊວງປ້ອງກັນປະເທດຈີນກ່າວວ່າ: ກຳປັ່ນ 570 ແລະກຳປັ່ນ 514 ຂອງກອງທັບເຮືອຈີນໄດ້ປະຕິບັດໜ້າທີ່ຢ່າງວ່ອງໄວໂດຍໄດ້ກວດກາແລະຢືນຢັນແລ້ວເຕືອນພ້ອມທັງຂັບໄລ່ກຳປັ່ນຮົບອາເມລິກາອອກຈາກເຂດດັ່ງກ່າວຢ່າງຖືກຕ້ອງຕາມກົດໝາຍ.
ທ່ານເຢິນໂກສຽງຊີ້ໃຫ້ເຫັນວ່າ: ຈີນມີອະທິປະໄຕຕໍ່ໝູ່ເກາະຕ່າງໆພ້ອມດ້ວຍເຂດທະເລໃກ້ຄຽງຢູ່ທະເລຈີນໃຕ້ໂດຍບໍ່ສາມາດໂຕ້ຖຽງກັນໄດ້, ແຕ່ອາເມລິກາສົ່ງກຳປັ່ນຮົບເຂົ້າສູ່ເຂດເກາະຕ່າງໆຢູ່ທະເລຈີນໃຕ້ໂດຍບໍ່ໄດ້ຮັບການອະນຸຍາດຫຼາຍຄັ້ງຕິດຕໍ່ກັນ ເຊິ່ງການກະທຳຂອງອາເມລິກາໄດ້ສ້າງຜົນເສຍຫາຍຕໍ່ອະທິປະໄຕແລະຄວາມໝັ້ນຄົງຂອງຈີນຢ່າງໜັກໜ່ວງ ແລະເປັນການລະເມີດກົດພື້ນຖານຂອງການພົວພັນລະຫວ່າງຊາດ ທັງເປັນໄພຂົ່ມຂູ່ຕໍ່ສັນຕິພາບແລະສະຖຽນລະພາບຂອງພາກພື້ນ.
ທ່ານເຢິນໂກສຽງກ່າວຕື່ມວ່າ: ການກະທຳດັ່ງກ່າວຂອງອາເມລິກາໄດ້ທຳລາຍບັນຍາກາດສາຍພົວພັນສອງປະເທດແລະສອງກອງທັບຈີນ-ອາເມລິກາ, ເຮັດໃຫ້ກຳລັງທະຫານເຮືອແລະທະຫານອາກາດຂອງສອງຝ່າຍຜະເຊີນໜ້າກັນໃນໄລຍະໃກ້ ເຊິ່ງອາດເປັນເຫດເຮັດໃຫ້ເກີດການຜິດພາດແລະນຳໄປສູ່ການເກີດເຫດທາງທະເລແລະທາງອາກາດເໜືອຄວາມຄາດໝາຍໄດ້ຢ່າງງ່າຍດາຍທີ່ສຸດ, ຖືວ່າເປັນການທ້າທາຍເກາະຜິດທາງການເມືອງແລະການທະຫານຕໍ່ຈີນຢ່າງໜັກໜ່ວງ. ກອງທັບຈີນຄັດຄ້ານເລື່ອງນີ້ຢ່າງເດັດຂາດ.
 |
