ວັນທີ 23 ມີນານີ້, ທ່ານມາຈ່າວຊີ້ ຜູ້ຕາງໜ້າຈີນປະຈຳອົງການສະຫະປະຊາຊາດໄດ້ແນະນຳນະໂຍບາຍນ້ຳຂອງຈີນໃນກິດຈະກຳລະດັບສູງກ່ຽວກັບແຜນການ "ທົດສະວັດແຫ່ງການເຄື່ອນໄຫວນ້ຳສາກົນ" ຂອງສະມັດຊາໃຫຍ່ອົງການສປຊ.
ທ່ານກ່າວວ່າ: ລັດຖະບານຈີນຕັ້ງໜ້າປະຕິບັດຕາມທັດສະນະພັດທະນາແບບປະດິດສ້າງໃໝ່, ປະສານສົມທົບ, ສີຂຽວ ເປີດປະຕູແລະນຳໃຊ້ຮ່ວມກັນ, ຈັດຕັ້ງປະຕິບັດລະບຽບການຄຸ້ມຄອງຊັບພະຍາກອນນ້ຳທີ່ເຂັ້ມງວດທີ່ສຸດ; ຍົກສູງປະສິດທິຜົນການໃຊ້ນ້ຳ, ປະຕິບັດແຜນການປະຢັດນ້ຳທົ່ວປວງຊົນ; ສົ່ງເສີມການຜະລິດຢ່າງສະອາດ, ບຳບັດນ້ຳໂສໂຄ ແລະນຳໃຊ້ຊັບພະຍາກອນນ້ຳແບບໝູນວຽນ; ເລັ່ງການປ້ອງກັນ ແລະປົວການມົນລະພິດນ້ຳ, ປັບປຸງຄຸນນະພາບນ້ຳ; ປົວລະປັດນິເວດນ້ຳ, ຍົກສູງຄວາມສາມາດໃນການຮັກສາແຫຼ່ງນ້ຳ; ປັບປຸງລະບົບປົວລະປັດນ້ຳ ແລະສ້າງໂຄງປະກອບທີ່ໃຫ້ທົ່ວສັງຄົມເຂົ້າຮ່ວມ.
ທ່ານກ່າວຕື່ມວ່າ: ຈີນໄດ້ແກ້ໄຂບັນຫາອາຫານການກິນຂອງປະຊາຊົນ 21% ໃນທົ່ວໂລກດ້ວຍຊັບພະຍາກອນນ້ຳຈືດ 6% ແລະເນື້ອທີ່ດິນປູກຝັງ 9% ໃນໂລກ. ໄດ້ຮັກສາຈັງຫວະການເຕີບໂຕທາງເສດຖະກິດໃນຄວາມໄວລະດັບກາງ ແລະສູງດ້ວຍການເພີ່ມຂຶ້ນໃນການໃຊ້ນ້ຳພຽງໜ້ອຍໜຶ່ງ ນີ້ເປັນການປະກອບສ່ວນທີ່ສຳຄັນໃນການພັດທະນາຂອງໂລກ. ຈີນຍັງໄດ້ຊ່ວຍເຫຼືອປະເທດທີ່ພວມພັດທະນາຫຼາຍກວ່າ 30 ປະເທດດຳເນີນການກໍ່ສ້າງຊົນລະປະທານ ແລະພະລັງງານໄຟຟ້ານ້ຳຕົກ ແລະຈັດການຝຶກອົບຮົມໃຫ້ພະນັກງານເຕັກນິກ ແລະຄຸ້ມຄອງຫຼາຍກວ່າ 2000 ຄົນໃນ 100 ກວ່າປະເທດ, ໄດ້ຍົກສູງລະດັບຄວາມສາມາດຂອງພະນັກງານເຕັກນິກຊົນລະປະທານຂອງບັນດາປະເທດທີ່ພວມພັດທະນາຢ່າງບໍ່ຢຸດຢັ້ງ.
 |
