ຕາມຂ່າວ CRI: ທ່ານໂດນັນ ທຣຳ ປະທານາທິບໍດີອາເມລິກາ ໄດ້ລົງນາມໃນບົດບັນທຶກຊ່ວຍຈຳເມື່ອບໍ່ດົນມານີ້ ໂດຍປະກາດຈະເກັບພາສີຕໍ່ສິນຄ້າຈີນທີ່ສົ່ງອອກໄປອາເມລິກາໃນຂອບເຂດທີ່ກວ້າງຂວາງ ທັງຈຳກັດວິສາຫະກິດຈີນລົງທຶນແລະກວາດຊື້ບໍລິສັດຕ່າງໆຢູ່ອາເມລິກາ. ທ່ານບຳບັງ ເຊີໂຢໂນ ຜູ້ຊ່ຽວຊານຂອງອິນໂດເນເຊຍທີ່ຄົ້ນຄວ້າກ່ຽວກັບປະເທດຈີນ ທັງເປັນບັນນາທິການໃຫຍ່ໜັງສືພິມ "ໂຄຣັນ ບາຣູ ອິນໂດເນເຊຍ" ແລະ ໜັງສືພິມ "ບາຫຼີເຟງໄຊ" ໄດ້ໃຫ້ສຳພາດຕໍ່ນັກຂ່າວວິທະຍຸສາກົນແຫ່ງປະເທດຈີນ ຫຼື CRI ວ່າ: ອາເມລິກາໃຊ້ມາດຕະການດັ່ງກ່າວກໍໄດ້ວາງອຸບາຍມາແຕ່ດົນແລ້ວ ແລະຖ້າອາເມລິກາກໍ່ສົງຄາມການຄ້າ ກໍຈະເປັນຜູ້ເສຍໄຊເອງ.
ທ່ານບຳບັງ ເຊີໂຢໂນ ຊີ້ໃຫ້ເຫັນວ່າ: ຈຸດປະສົງຂອງອາເມລິກາ ກໍຄື ລະງັບການສົ່ງອອກ ແລະ ການລົງທຶນຂອງຈີນ ໂດຍສະເພາະແມ່ນແນໃສ່ "ການຜະລິດຂອງຈີນ 2025" ກໍເພື່ອສະກັດກັ້ນການພັດທະນາຂອງຈີນໃນຂົງເຂດວິທະຍາສາດເຕັກນິກ ແລະອື່ນໆ. ການກະທຳຂອງອາເມລິກາກໍສະແດງເຖິງຄວາມບໍ່ໝັ້ນໃຈຕໍ່ການພັດທະນາຂອງຕົນເອງ ແລະ ຢ້ານກົວຕໍ່ການທ້າທາຍຈາກປະເທດອື່ນ.
ທ່ານບຳບັງ ເຊີໂຢໂນ ກ່າວຕື່ມວ່າ: ລັດຖະບານຈີນໃຫ້ຄຳໝັ້ນສັນຍາວ່າຈະເປີດປະຕູຕໍ່ພາຍນອກນັບມື້ນັບກວ້າງຂວາງອອກຕື່ມ ເຊິ່ງຈະເປັນການຊຸກຍູ້ໃຫ້ອິນໂດເນເຊຍສົ່ງອອກສິນຄ້າທີ່ໄດ້ປຽບຂອງຕົນໄປຈີນ ແລະສາມາດເຂົ້າແທນຜະລິດຕະພັນກະສິກຳຂອງອາເມລິກາສ່ວນໜຶ່ງ ການພົວພັນລະຫວ່າງອິນໂດເນເຊຍ-ຈີນດ້ານເສດຖະກິດການຄ້າຈະສືບຕໍ່ຮັດແໜ້ນຍິ່ງໆຂຶ້ນ.
