ພິທີເລີ່ມປະຕິບັດໂຄງການປັບປຸງທາງຫຼວງແຫ່ງຊາດເລກ 11 ຂອງກຳປູເຈຍ ໄດ້ຈັດຂຶ້ນຢູ່ແຂວງເປຼແວງໃນຫວ່າງກ່ອນນີ້ບໍ່ດົນ. ທ່ານ ຮຸນແຊນ ນາຍົກລັດຖະມົນຕີກຳປູເຈຍ, ທ່ານ ຊົງໂປ່ ເອກອັກຄະລັດຖະທູດຈີນປະຈຳກຳປູເຈຍ ພ້ອມດ້ວຍປະຊາຊົນທ້ອງຖິ່ນຫຼາຍພັນຄົນໄດ້ເຂົ້າຮ່ວມ.
ທ່ານ ຊົງໂປ່ ກ່າວໃນພິທີວ່າ, ລັດຖະບານຈີນໄດ້ປະຕິບັດໂຄງການພື້ນຖານໂຄງລ່າງແລະໂຄງການປັບປຸງຊີວິດການເປັນຢູ່ຂອງປະຊາຊົນຈຳນວນຫຼວງຫຼາຍໃຫ້ກຳປູເຈຍໂດຍຜ່ານການຊ່ວຍເຫຼືອລ້າແລະການປ່ອຍເງິນກູ້ດອກເບ້ຍຕ່ຳ, ເຊິ່ງມີຈຸດປະສົງເພື່ອຊ່ວຍກຳປູເຈຍເລັ່ງລັດການພັດທະນາ ແລະປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ ໂດຍບໍ່ມີເງື່ອນໄຂທາງການເມືອງແຕ່ຢ່າງໃດ. ເຊື່ອໝັ້ນວ່າ, ຫຼັງຈາກສຳເລັດໂຄງການປັບປຸງທາງຫຼວງເລກ 11 ແລ້ວ ຈະຍົກສູງລະດັບການເຊື່ອມຈອດກັນຂອງທ້ອງຖິ່ນດັ່ງກ່າວຢ່າງບັງເກີດຜົນ, ຊຸກຍູ້ການພັດທະນາເສດຖະກິດ-ສັງຄົມຂອງພາກພື້ນຢ່າງແຂງແຮງ, ແລະສ້າງຜົນປະໂຫຍດຕົວຈິງໃຫ້ແກ່ປະຊາຊົນແລະວິສາຫະກິດທ້ອງຖິ່ນ, ກາຍເປັນເສັ້ນທາງແຫ່ງການສ້າງຄວາມຮັ່ງມີແລະເສັ້ນທາງແຫ່ງຄວາມສຸກ.
ທາງຫຼວງແຫ່ງຊາດເລກ 11 ຂອງກຳປູເຈຍເຊື່ອມຕໍ່ແຂວງເປຼແວງແລະແຂວງຕະບອງຄະໝູມ, ແລະເຮັດໃຫ້ທາງຫຼວງແຫ່ງຊາດເລກ 1, ເລກ 7 ແລະເລກ 8 ເຊື່ອມຕໍ່ກັນ, ແມ່ນພາກສ່ວນສຳຄັນຂອງເຄືອຂ່າຍທາງຫຼວງພາກກາງກຳປູເຈຍ. ທາງຫຼວງເສັ້ນນີ້ຍາວ 96,48 ກິໂລແມັດ, ຮັບເໝົາກໍ່ສ້າງໂດຍບໍລິສັດຂົວທາງຈີນ.
 |
