ວັນທີ 26 ມີນານີ້, ທ່ານເຈິ້ງເຈີກ່ວງ ຮອງລັດຖະມົນຕີກະຊວງການຕ່າງປະເທດຈີນ ໄດ້ກ່າວຕໍ່ຜົນການກວດກາ 301 ຕໍ່ຈີນທີ່ອາເມລິກາດຳເນີນແຕ່ຝ່າຍດຽວແລະປະກາດຫວ່າງມໍ່ໆມານີ້ວ່າ: ການກະທຳຂອງອາເມລິກາບໍ່ສອດຄ່ອງກັບກົດລະບຽບຂອງອົງການການຄ້າໂລກ ທັງຝຶນກັບເຈດຈຳນົງຮ່ວມມືຂອງວົງການອຸດສາຫະກຳການຄ້າຂອງສອງປະເທດ. ຈີນບໍ່ຢາກເຮັດສົງຄາມການຄ້າ ແຕ່ກໍບໍ່ຢ້ານສົງຄາມການຄ້າເຊັ່ນກັນ.
ທ່ານເຈິ້ງເຈີກ່ວງ ໄດ້ໃຫ້ທັດສະນະດັ່ງກ່າວ ຂະນະທີ່ກ່າວປາໄສທີ່ພາດຫົວວ່າ "ການຕ່າງປະເທດຖານະເປັນປະເທດໃຫຍ່ທີ່ມີສີສັນພິເສດຂອງຈີນ" ໃນເວທີປຶກສາຫາລືລະດັບສູງກ່ຽວກັບການພັດທະນາຂອງຈີນຄັ້ງທີ 19. ທ່ານກ່າວວ່າ: ການພົວພັນເສດຖະກິດ-ການຄ້າລະຫວ່າງຈີນ-ອາເມລິກາໃນທາດແທ້ແມ່ນຕ່າງຝ່າຍຕ່າງມີຜົນປະໂຫຍດ ໂດຍໄດ້ສ້າງຜົນປະໂຫຍດທີ່ແທ້ຈິງໃຫ້ແກ່ປະຊາຊົນສອງປະເທດຢ່າງຫຼວງຫຼາຍ. ຂະນະທີ່ໃນຂະບວນການພັດທະນາການຮ່ວມມືດ້ານເສດຖະກິດ-ການຄ້າລະຫວ່າງສອງປະເທດຢ່າງວ່ອງໄວນັ້ນ ການເກີດຄວາມບໍ່ດຸນດ່ຽງກັນດ້ານການຄ້າ ກໍເປັນບັນຫາທຳມະດາທີ່ສຸດ ບໍ່ແມ່ນເລື່ອງແປກປະຫຼາດ ຈຶ່ງຄວນແກ້ໄຂໂດຍຜ່ານການຫາລືກັນເພື່ອຄົ້ນຫາວິທີແກ້ໄຂທີ່ສອງຝ່າຍລ້ວນແຕ່ຮັບເອົາໄດ້.
ທ່ານເຈິ້ງເຈີກ່ວງ ຍັງເນັ້ນວ່າ: ຈີນມີຄວາມຕັດສິນໃຈຢ່າງເດັດດ່ຽວ ແລະ ມີຄວາມກຽມພ້ອມຢ່າງເຕັມສ່ວນ ເພື່ອຮັບມືກັບສົງຄາມການຄ້າຢ່າງເດັດດ່ຽວ ເພື່ອປົກປັກຮັກສາຜົນປະໂຫຍດປະເທດຕົນ ຫວັງວ່າອາເມລິກາຈະຮັກສາຄວາມໃຈເຢັນ, ຮ່ວມກັບຈີນສຶກສາຫາວິທີແກ້ໄຂບັນຫາຢ່າງເໝາະສົມ ບົນພື້ນຖານເຄົາລົບເຊິ່ງກັນແລະກັນ, ສະເໝີພາບ ແລະຕ່າງຝ່າຍຕ່າງມີຜົນປະໂຫຍດ ນີ້ຈຶ່ງເປັນຜົນດີຕໍ່ສອງປະເທດ ແລະຕໍ່ໂລກ.
