ເຈົ້າໜ້າທີ່ກະຊວງການຕ່າງປະເທດຣັດເຊຍຖະແຫຼງໃນວັນທີ 26 ມີນານີ້ ໂດຍສະແດງຄວາມປະທ້ວງຢ່າງຮຸນແຮງຕໍ່ປະເທດຕາເວັນຕົກທີ່ຂັບໄລ່ເຈົ້າໜ້າທີ່ການທູດຣັດເຊຍ ແລະ ກ່າວວ່າ, ການກະທຳແບບນີ້ຈະບໍ່ມີຜົນດີຕໍ່ການສືບສວນຄະດີອະດີດນັກສືບຂ່າວຣັດເຊຍທີ່ "ຖືກວາງຢາເບື່ອ" ແລະ ທຳລາຍລະບຽບການສົນທະນາສາກົນ ແລະ ກົດໝາຍສາກົນທີ່ກ່ຽວຂ້ອງ. ຣັດເຊຍຈະມີການໂຕ້ຕອບຕໍ່ເລື່ອງນີ້ຢ່າງເດັດຂາດເຊັ່ນກັນ.
ມື້ດຽວກັນ, ທ່ານໂດນັນ ດູສກ໌ ປະທານສະພາມົນຕີເອີລົບໄດ້ຢືນຢັນວ່າມີ 14 ປະເທດສະມາຊິກສະຫະພາບເອີລົບປະກາດຂັບໄລ່ເຈົ້າໜ້າທີ່ການທູດຣັດເຊຍ ເພື່ອເປັນການຕອບໂຕ້ຄືນຕໍ່ຣັດເຊຍທີ່ຖືກສົງໄສວ່າລອບຂ້າອະດີດນັກສືບຂ່າວຣັດເຊຍຢູ່ອັງກິດ. ມື້ດຽວກັນ, ອາເມລິກາປະກາດຂັບໄລ່ເຈົ້າໜ້າທີ່ການທູດຫຼາຍສິບຄົນຂອງຣັດເຊຍ ແລະ ສັ່ງປິດສະຖານກົງສູນຣັດເຊຍປະຈຳເມືອງຊີແອັດໂທວ ແລະ ການາດາກໍປະກາດຂັບໄລ່ເຈົ້າໜ້າທີ່ການທູດຣັດເຊຍ 4 ຄົນ.