ຫ້ອງທົດລອງກວດກາຄຸນນະພາບນ້ຳທີ່ຈີນຊ່ວຍກຳປູເຈຍສ້າງນັ້ນ ໄດ້ເປີດບໍລິການຢູ່ນະຄອນຫຼວງພະນົມເປັນໃນວັນທີ 26 ມີນານີ້ ໂດຍສອງຝ່າຍໄດ້ເຊັນ "ບົດບັນທຶກຄວາມເຂົ້າໃຈການຮ່ວມມືດ້ານການອະນຸລັກສິ່ງແວດລ້ອມຈີນ-ກຳປູເຈຍ". ທ່ານ ປ໊າຍຊຸ່ນຫຼີ ຫົວໜ້າສະຖາບັນວິທະຍາສາດຈີນ ແລະ ທ່ານ ໄຊຊຳໄອ ລັດຖະມົນຕີກະຊວງສິ່ງແວດລ້ອມກຳປູເຈຍ ໄດ້ເຂົ້າຮ່ວມພິທີດັ່ງກ່າວ.
ທ່ານ ໄຊຊຳໄອ ກ່າວວ່າ, ຂໍສະແດງຄວາມຂອບໃຈຕໍ່ລັດຖະບານຈີນທີ່ສະໜັບສະໜູນວຽກງານອະນຸລັກສິ່ງແວດລ້ອມຂອງກຳປູເຈຍເປັນເວລາຍາວນານ, ຫວັງວ່າ ຜ່ານການເຊັນແລະຈັດຕັ້ງປະຕິບັດບົດບັນທຶກຄວາມເຂົ້າໃຈ ຈະຮ່ວມກັນຊຸກຍູ້ການອະນຸລັກສິ່ງແວດລ້ອມ.
ອີງຕາມບົດບັນທຶກຄວາມເຂົ້າໃຈດັ່ງກ່າວ, ສອງຝ່າຍຈະດຳເນີນການແລກປ່ຽນແລະຮ່ວມມືກັນຢ່າງກວ້າງຂວາງກ່ຽວກັບການແກ້ໄຂບັນຫາການລະບາຍແລະກຳຈັດນ້ຳເປື້ອນໃນຕົວເມືອງ, ການກວດກາຄຸນນະພາບນ້ຳ ພ້ອມດ້ວຍການໄປມາຫາສູ່ກັນແລະການຍົກລະດັບບຸກຄະລາກອນ.
ຂ່າວແຈ້ງວ່າ, ຫ້ອງທົດລອງກວດກາຄຸນນະພາບນ້ຳທີ່ຈີນຊ່ວຍສ້າງນັ້ນ ເລີ່ມສ້າງໃນເດືອນພະຈິກປີຜ່ານມາ ແລະສຳເລັດໃນເດືອນທັນວາປີດຽວກັນ.
 |
