ວັນທີ 26 ມີນານີ້, ທ່ານ ອັນໂຕນີໂອ ກູເທີເຣັສ ເລຂາທິການໃຫຍ່ອົງການສະຫະປະຊາຊາດ ໄດ້ກ່າວປະນາມຢ່າງຮຸນແຮງຕໍ່ກຸ່ມປະກອບອາວຸດຮູຊີຂອງເຢເມັນທີ່ຍິງຂີປະນາວຸດໃສ່ອາຣັບບີຊາອຸດິດໃນກ່ອນໜ້ານີ້ມື້ໜຶ່ງ.
ທ່ານ ຟາຮານ ຮາກ ຮອງໂຄສົກເລຂາທິການໃຫຍ່ອົງການສະຫະປະຊາຊາດ ຖະແຫຼງໃນມື້ດຽວກັນວ່າ, ທ່ານເລຂາທິການໃຫຍ່ ເລັ່ງທວງໃຫ້ບັນດາຝ່າຍທີ່ປະທະກັນຈົ່ງເຄົາລົບພັນທະທີ່ຖືກກຳນົດໃນກົດໝາຍມະນຸດສະທຳສາກົນ, ປ້ອງກັນບໍ່ໃຫ້ປະຊາຊົນຜູ້ບໍ່ມີໂທດຫຍັງແລະພື້ນຖານໂຄງລ່າງພົນລະເຮືອນຖືກໂຈມຕີ, ພ້ອມກັນນັ້ນ, ຍັງຮຽກຮ້ອງໃຫ້ບັນດາຝ່າຍຈົ່ງຮັກສາຄວາມອົດກັ້ນໄວ້ ແລະເນັ້ນວ່າ, ການຍົກລະດັບດ້ານການທະຫານບໍ່ແມ່ນທາງອອກ.
ທ່ານ ກູເທີເຣັສ ກ່າວວ່າ, ສົງຄາມກາງເມືອງຂອງເຢເມັນ ໄດ້ສືບຕໍ່ກັນມາເປັນເວລາ 3 ປີແລ້ວ, ການປະທະກັນດ້ານການທະຫານແລະວິກິດການມະນຸດສະທຳ ຕ້ອງແກ້ໄຂທາງການເມືອງໂດຍຜ່ານການເຈລະຈາແບບກວມລວມຢູ່ພາຍໃນເຢເມັນ.ຂ່າວແຈ້ງຕື່ມວ່າ, ວັນທີ 25 ມີນານີ້, ກອງທະຫານນານາຊາດທີ່ນຳໂດຍອາຣັບບີຊາອຸດິດ ກ່າວວ່າ, ຕອນຄ່ຳມື້ດຽວກັນ, ກຸ່ມປະກອບອາວຸດຮູຊີຂອງເຢເມັນ ໄດ້ຍິງຂີປະນາວຸດ 7 ລູກໃສ່ອາຣັບບີຊາອຸດິດ, ແຕ່ຖືກຍິງສະກັດຢ່າງສຳເລັດຜົນທັງໝົດ. ຊາກຂີປະນາວຸດໄດ້ເຮັດໃຫ້ປະຊາຊົນເສຍຊີວິດ 1 ຄົນ ແລະບາດເຈັບ 2 ຄົນ.
 |
