ທ່ານຫຼີປ໊າວຕົ່ງ ຮອງລັດຖະມົນຕີກະຊວງການຕ່າງປະເທດຈີນ ກ່າວຢູ່ນະຄອນຫຼວງຕັສເກນ ປະເທດອຸສເບກິສະຖານໃນວັນທີ 27 ມີນານີ້ວ່າ: ຈີນຍິນດີຮ່ວມກັບອັຟການີສະຖານຊຸກຍູ້ການຮ່ວມມືທີ່ແທຈິງໃນຂົງເຂດຕ່າງໆ ເພື່ອຊ່ວຍປະເທດດັ່ງກ່າວບັນລຸສັນຕິພາບແລະພັດທະນາໂດຍໄວ.
ກອງປະຊຸມລະດັບສູງວ່າດ້ວຍບັນຫາອັຟການີສະຖານ ໄດ້ຈັດຂຶ້ນຢູ່ນະຄອນຫຼວງຕັສເກນ ປະເທດອຸສເບກິສະຖານໃນວັນທີ 27 ມີນານີ້ ໃນຫົວຂໍ້ "ຂະບວນການສັນຕິພາບ, ການຮ່ວມມືດ້ານຄວາມໝັ້ນຄົງກັບການເຊື່ອມຈອດພາກພື້ນ" ໂດຍຜູ້ແທນຈາກ 20 ປະເທດ ແລະອົງການຈັດຕັ້ງສາກົນ ເຊັ່ນ ອັຟການີສະຖານ, ປາກິສະຖານ, ອີຣານ, ອາເມລິກາ, ຣັດເຊຍ, ອົງການສະຫະປະຊາຊາດ ແລະ ສະຫະພາບເອີຣົບ ເຂົ້າຮ່ວມ ທ່ານຫຼີປ໊າວຕົ່ງ ຮອງລັດຖະມົນຕີກະຊວງການຕ່າງປະເທດຈີນ ກໍນຳພາຄະນະຜູ້ແທນເຂົ້າຮ່ວມ ແລະໃນກອງປະຊຸມ, ຝ່າຍຕ່າງໆ ໄດ້ຫາລືກ່ຽວກັບຂະບວນການປອງດອງຊາດອັຟການີສະຖານ, ການຮ່ວມກັນຮັບມືກັບໄພຂົ່ມຂູ່ຈາກລັດທິກໍ່ການຮ້າຍ, ຊຸກຍູ້ການຮ່ວມມືເສດຖະກິດພາກພື້ນ, ການເຊື່ອມຈອດ ແລະອື່ນໆ ແລະກໍໄດ້ບັນລຸຄວາມຮັບຮູ້ທີ່ເປັນເອກະພາບກັນ.
ຫຼັງປະຊຸມ, ບັນດາຝ່າຍກໍໄດ້ຮັບຮອງເອົາ "ຖະແຫຼງການຕັສເກນ" ໂດຍລະບຸວ່າ: ການເຈລະຈາດ້ານການເມືອງກັບກຸ່ມຕາລີບັນແມ່ນຊ່ອງທາງທີ່ດີທີ່ສຸດໃນການສິ້ນສຸດຄວາມຮຸນແຮງຢູ່ອັຟການີສະຖານ ແລະຮຽກຮ້ອງໃຫ້ກຸ່ມຕາລີບັນເຫັນດີກັບຂໍ້ສະເໜີໃນການເຈລະຈາສັນຕິພາບ.
