ທ່ານຫຼີເຄີ້ສຽງ ນາຍົກລັດຖະມົນຕີຈີນ ໄດ້ຕ້ອນຮັບການເຂົ້າຢ້ຽມຄຳນັບຂອງຄະນະສະມາຊິກສະພາທີ່ນຳພາໂດຍທ່ານສະເຕັຟ ໄດເນັສ ສະມາຊິກສະພາສູງສະຫະລັດອາເມລິກາ ຢູ່ນະຄອນຫຼວງປັກກິ່ງໃນວັນທີ 27 ມີນານີ້ ໂດຍກ່າວວ່າ: ການກໍ່ສົງຄາມການຄ້າຈະບໍ່ສາມາດແກ້ໄຂບັນຫາໄດ້ ຈີນຈະພະຍາຍາມໄປຕາມທິດທາງທີ່ແກ້ໄຂບັນຫາໂດຍຜ່ານການປຶກສາຫາລືກັນ ແຕ່ຂະນະດຽວກັນ ກໍໄດ້ກຽມຄວາມພ້ອມຢ່າງເຕັມສ່ວນແລ້ວທີ່ຈະຮັບມືກັບສົງຄາມການຄ້າ.
ທ່ານຫຼີເຄີ້ສຽງ ຊີ້ໃຫ້ເຫັນວ່າ: ເສດຖະກິດຈີນແລະອາເມລິກາຕ່າງກໍຊ່ວຍຊູຍູ້ໜູນກັນ, ການຮ່ວມມືກໍນັບມື້ນັບຂະຫຍາຍວົງກວ້າງອອກ ສ່ວນການມີຄວາມຂັດແຍ້ງກັນບາງຢ່າງກໍເປັນເລື່ອງທີ່ຫຼີກລ່ຽງບໍ່ໄດ້ ຈຶ່ງຫວັງວ່າອາເມລິກາຈະໄປທິດທາງດຽວກັນກັບຈີນ ແລະ ໃຊ້ທ່າທີທີ່ຕິດແທດຕົວຈິງ ແລະມີສະຕິ ເຊິ່ງຈະເປັນຜົນດີທີ່ສຸດຕໍ່ການຮັກສາກົດລະບຽບການຄ້າຫຼາຍຝ່າຍ ແລະ ມີຜົນດີຕໍ່ສອງປະເທດ ແລະຕໍ່ໂລກ.
ທ່ານໄດເນັສ ແລະສະມາຊິກສະພາສູງອາເມລິກາທ່ານອື່ນໆ ຕ່າງກໍກ່າວວ່າ: ສາຍພົວພັນອາເມລິກາ-ຈີນແມ່ນໜຶ່ງໃນສາຍພົວພັນສອງຝ່າຍທີ່ສຳຄັນທີ່ສຸດໃນໂລກ ສອງປະເທດບໍ່ມີເຫດຜົນໃດໆ ທີ່ຈະເກີດການປະທະກັນ. ລັດຖະສະພາອາເມລິກາຍິນດີຊຸກຍູ້ໃຫ້ແກ້ໄຂຄວາມຂັດແຍ້ງທາງການຄ້າລະຫວ່າງສອງປະເທດດ້ວຍວິທີທີ່ຕ່າງຝ່າຍຕ່າງມີຜົນປະໂຫຍດ ເຮັດໃຫ້ການພັດທະນາສາຍພົວພັນລະຫວ່າງສອງປະເທດສ້າງຜົນປະໂຫຍດໃຫ້ແກ່ປະຊາຊົນສອງຊາດຢ່າງຕໍ່ເນື່ອງ.
