ວັນທີ 28 ມີນານີ້, ທ່ານ ໂຣເບີດ ໄລທ໌ຊີເຈີ ຜູ້ແທນການຄ້າອາເມລິກາກ່າວວ່າ, ລັດຖະບານສອງປະເທດອາເມລິກາແລະຈີນ ມີຫວັງຈະປຶກສາຫາລືກັນເພື່ອຫຼີກລ້ຽງການເພີ່ມພາສີໃຫ້ສິນຄ້າຈີນ.
ທ່ານ ໄລທ໌ຊີເຈີ ໄດ້ໃຫ້ສຳພາດຕໍ່ຊ່ອງຂ່າວແລະການຄ້າຜູ້ບໍລິໂພກອາເມລິກາໃນມື້ດັ່ງກ່າວວ່າ, ອີກບໍ່ດົນ, ລັດຖະບານອາເມລິກາຈະເປີດເຜີຍບັນຊີພາສີທີ່ພົວພັນກັບສິນຄ້ານຳເຂົ້າຈາກຈີນ, ຫຼັງຈາກນັ້ນ, ຈະໃຫ້ເວລາ 60 ວັນເພື່ອໃຫ້ປະຊາຊົນມີໂອກາດປະກອບຄຳເຫັນຕໍ່ຜົນສະທ້ອນຈາກການເພີ່ມພາສີຕໍ່ສິນຄ້ານຳເຂົ້າຈາກຈີນ.
ຫ້ອງການຜູ້ແທນການຄ້າອາເມລິກາເປີດເຜີຍວ່າ, ຫ້ອງການຕົນຈະຮັບເອົາຄຳເຫັນເປັນລາຍລັກອັກສອນພາຍໃນ 30 ວັນຫຼັງການເປີດເຜີຍບັນຊີສິນຄ້າ, ແລະຈະຈັດງານຮັບຟັງຄຳເຫັນຢ່າງເປີດເຜີຍຄັ້ງໜຶ່ງພາຍໃນອີກ 30 ວັນຕໍ່ໄປ.
ໃນເວລາຖືກຖາມວ່າ, ການປຶກສາຫາລືລະຫວ່າງອາເມລິກາກັບຈີນ ຈະສາມາດຫຼີກລ້ຽງການເພີ່ມພາສີຕໍ່ສິນຄ້າຈີນຫຼືບໍ່, ທ່ານ ໄລທ໌ຊີເຈີຕອບວ່າ "ມີຄວາມຫວັງ". ທ່ານກ່າວຕື່ມວ່າ, ອາເມລິກາແລະຈີນມີໂຄງປະກອບເສດຖະກິດທີ່ບໍ່ຄືກັນ, ຈຶ່ງມີການພົວພັນທີ່ເຄັ່ງຕຶງໃນລະດັບໃດໜຶ່ງໂດຍຫຼີກບໍ່ພົ້ນ, ແຕ່ທ່ານເຊື່ອວ່າ ການພົວພັນເສດຖະກິດການຄ້າສອງປະເທດຈະກ້າວໄປສູ່ໝາກຜົນທີ່ດີໃນທີ່ສຸດ.
 |
