ຫຼັງສິ້ນສຸດການຝຶກຊ້ອມຮ່ວມການເຄື່ອນໄຫວຕ້ານການກໍ່ການຮ້າຍ ເຊິ່ງເປັນການເຄື່ອນໄຫວປິດທ້າຍ, ການຝຶກຊ້ອມຮ່ວມຕ້ານລັດທິກໍ່ການຮ້າຍແລະການຊ່ວຍເຫຼືອທາງມະນຸດສະທຳຈີນ-ກຳປູເຈຍ "ຈິ່ນລົ໊ງ-2018" ກໍໄດ້ສຳເລັດລົງແລະຈັດພິທີປິດຢູ່ສະໜາມຝຶກຊ້ອມລວມແຫ່ງໜຶ່ງ ປະເທດກຳປູເຈຍໃນຕອນເຊົ້າວັນທີ 29 ມີນານີ້ ໂດຍທ່ານໂຈ່ວຊົ່ງເຫີ ຮອງຜູ້ບັນຊາການກອງທັບບົກ ກອງທັບປົດປ່ອຍປະຊາຊົນຈີນ, ທ່ານສົງໂປ່ ເອກອັກຄະລັດຖະທູດຈີນປະຈຳກຳປູເຈຍ ແລະ ທ່ານເຕຍບັນ ຮອງນາຍົກລັດຖະມົນຕີ ທັງເປັນລັດຖະມົນຕີກະຊວງປ້ອງກັນປະເທດກຳປູເຈຍ ເຂົ້າຮ່ວມ ທັງກ່າວປາໄສໃນພິທີດັ່ງກ່າວ.
ຂ່າວລາຍງານວ່າ: ການຝຶກຊ້ອມຮ່ວມເທື່ອນີ້ໄດ້ໃຊ້ວິທີທີ່ທະຫານສອງປະເທດຈັດຕັ້ງປະກອບຮ່ວມແລະຝຶກຊ້ອມຮ່ວມ ໂດຍຕົ້ນຕໍດຳເນີນການຝຶກຊ້ອມໃນການນຳໃຊ້ຍຸດໂທປະກອນຕ້ານລັດທິກໍ່ການຮ້າຍ, ການຊ້ອມຍິງອາວຸດເບົາດ້ວຍລູກປືນແທ້, ການຕໍ່ສູ້ກັນດ້ວຍມື, ການລົງຈອດຍົນແບບຈຳລອງ, ການໄລ່ລ່າ ແລະວິຊາຫັດແອບອື່ນໆ ເພື່ອເພີ່ມທະວີຄວາມສາມາດຂອງສອງກອງທັບໃນການປະຕິບັດໜ້າທີ່ການຝຶກຊ້ອມດ້ານການຕ້ານລັດທິກໍ່ການຮ້າຍ ແລະ ການຊ່ວຍເຫຼືອທາງມະນຸດສະທຳ. ໃນໄລຍະຝຶກຊ້ອມ, ກອງຍ່ອຍຈີນທີ່ເຂົ້າຮ່ວມການຝຶກຊ້ອມດັ່ງກ່າວ ຍັງໄດ້ສົ່ງເຄື່ອງໃຊ້ໃນຊີວິດປະຈຳວັນ ແລະອຸປະກອນການຮຽນ ໃຫ້ແກ່ຊາວບ້ານ ແລະນັກຮຽນທ້ອງຖິ່ນ, ສ້ອມແປງເຮືອນປະຊາຊົນ ແລະ ກວດພະຍາດ, ສົ່ງຢາປິ່ນປົວສຸຂະພາບໃຫ້ແກ່ປະຊາຊົນທ້ອງຖິ່ນນຳອີກ.
