ແຫຼ່ງຂ່າວຈາກກະຊວງສຶກສາທິການຈີນໃຫ້ຮູ້ໃນວັນທີ 30 ມີນານີ້ວ່າ ປີຜ່ານມາ, ນັກສຶກສາຕ່າງປະເທດທີ່ໄປສຶກສາຕໍ່ຢູ່ມະຫາວິທະຍາໄລ ແລະສະຖາບັນການສຶກສາຊັ້ນສູງຂອງຈີນມີເຖິງ 489.200 ຄົນ ເຊິ່ງຕົວເລກດັ່ງກ່າວໄດ້ເພີ່ມຂຶ້ນຢ່າງຕໍ່ເນື່ອງ ສົ່ງຜົນເຮັດໃຫ້ຈີນກາຍເປັນປະເທດເປົ້າໝາຍທີ່ສາມາດດຶງດູດນັກສຶກສາຕ່າງປະເທດໄປສຶກສາຕໍ່ຫຼາຍທີ່ສຸດໃນອາຊີ.
ກະຊວງສຶກສາທິການເປີດເຜີຍວ່າ: ປີຜ່ານມາ, ມີນັກສຶກສາຈາກ 204 ປະເທດແລະເຂດແຄວ້ນໃນໂລກເດີນທາງໄປສຶກສາຕໍ່ຢູ່ມະຫາວິທະຍາໄລ ແລະສະຖາບັນການສຶກສາຊັ້ນສູງ 935 ແຫ່ງໃນ 31 ແຂວງ, ເຂດປົກຄອງຕົນເອງ ແລະ ກຳແພງນະຄອນທົ່ວປະເທດຈີນ ເພີ່ມຂຶ້ນ 18,62% ເມື່ອທຽບໃສ່ປີ 2016 ໃນນີ້, ມີນັກສຶກສາ 58.600 ຄົນຈາກ 180 ປະເທດໄດ້ຮັບທຶນການສຶກສາຈາກລັດຖະບານຈີນ, ກວມ 11,97%.
ເມື່ອທຽບກັບປີ 2016 ແລ້ວ, 10 ປະເທດທຳອິດທີ່ມີນັກສຶກສາໄປສຶກສາຕໍ່ຢູ່ຈີນຫຼາຍກວ່າໝູ່ ກໍມີການປ່ຽນແປງເລັກໜ້ອຍ ໂດຍລຽງຕາມລຳດັບແລ້ວ ຄື ສ.ເກົາຫຼີ, ໄທ, ປາກິສະຖານ, ອາເມລິກາ, ອິນເດຍ, ຣັດເຊຍ, ຍີ່ປຸ່ນ, ອິນໂດເນເຊຍ, ກາຊັກສະຖານ ແລະ ລາວ.