ຫວຽດນາມສົ່ງອອກຜະລິດຕະພັນກະສິກຳ, ປ່າໄມ້ແລະສິນໃນນ້ຳບັນລຸເຖິງປະມານ 9 ຕື້ໂດລາໃນໄຕມາດທີໜຶ່ງ
2018-03-30 16:39:04 cri
ໜັງສືພິມເສດຖະກິດຫວຽດນາມສະບັບວັນທີ 28 ມີນາລາຍງານວ່າ, ກະຊວງກະສິກຳແລະພັດທະນາຊົນນະບົດຫວຽດນາມເປີດເຜີຍວ່າ, ໃນເດືອນມີນາປີ 2018, ມູນຄ່າສົ່ງອອກຜະລິດຕະພັນ ກະສິກຳ, ປ່າໄມ້ແລະສິນໃນນ້ຳຂອງປະເທດຕົນບັນລຸເຖິງ 3 ຕື້ 100 ລ້ານໂດລາສະຫະລັດ, ໃນ 3 ເດືອນຕົ້ນປີນີ້ຍອດມູນຄ່າສົ່ງອອກຜະລິດຕະພັນດັ່ງກ່າວບັນລຸເຖິງ 8 ຕື້ 700 ລ້ານໂດລາສະຫະລັດ, ທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້ນ 9,6%. ໃນນັ້ນ, ການສົ່ງອອກຜະລິດຕະພັນກະສິກຳເພີ່ມຂຶ້ນ 9%, ຜະລິດຕະພັນສິນໃນນ້ຳເພີ່ມຂຶ້ນ 11,5% ແລະຜະລິດຕະພັນປ່າໄມ້ເພີ່ມຂຶ້ນ 6,6%. ຂະນະດຽວກັນ, ມູນຄ່ານຳເຂົ້າຜະລິດຕະພັນກະສິກຳ, ປ່າໄມ້ແລະສິນໃນນ້ຳໃນເດືອນມີນາມີເຖິງ 2 ຕື້ 430 ລ້ານໂດລາສະຫະລັດ, ຍອດມູນຄ່ານຳເຂົ້າໃນ 3 ເດືອນຕົ້ນປີນີ້ແມ່ນ 6 ຕື້ 890 ລ້ານໂດລາ, ທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້ນ 8,4%. ມູນຄ່າເກີນດຸນການຄ້າປະມານ 2 ຕື້ໂດລາສະຫະລັດ.
