ວັນທີ 29 ມີນານີ້, ກະຊວງການຕ່າງປະເທດຣັດເຊຍປະກາດວ່າ, ທ່ານ ເຊີເກ ຣີຢາບຄົບ ຮອງລັດຖະມົນຕີກະຊວງຕົນໄດ້ຮຽກພົບທ່ານ ຈອນ ຮູນສ໌ມານ ເອກອັກຄະລັດຖະທູດອາເມລິກາປະຈຳຣັດເຊຍ ເພື່ອແຈ້ງໃຫ້ຊາບວ່າ, ປະເທດຕົນຈະຂັບໄລ່ເຈົ້າໜ້າທີ່ການທູດອາເມລິກາປະຈຳປະເທດຕົນ 60 ຄົນ ແລະຈະປິດສະຖານກົງສຸນໃຫຍ່ຂອງອາເມລິກາປະຈຳແຊນປີເຕີສ໌ເບີກ ເພື່ອເປັນການຕອບໂຕ້ອາເມລິກາທີ່ຂັບໄລ່ເຈົ້າໜ້າທີ່ການທູດຣັດເຊຍອອກຈາກອາເມລິກາ.
ມື້ດຽວກັນ, ກະຊວງການຕ່າງປະເທດຣັດເຊຍອອກແຈ້ງການວ່າ, ອີງຕາມ ຫຼັກການສະເໝີພາບດ້ານການຕ່າງປະເທດ, ປະເທດຕົນຈັດເອົາເຈົ້າໜ້າທີ່ການທູດຂອງສະຖານທູດອາເມລິກາປະຈຳຢູ່ປະເທດຕົນ 58 ຄົນ ພ້ອມດ້ວຍປະຈຳສະຖານກົງສຸນໃຫຍ່ເຢຄາເທີຣິນເບີກ 2 ຄົນ ເປັນ "ຄົນທີ່ບໍ່ຍິນດີຕ້ອນຮັບ", ໂດຍເຫັນວ່າ ວຽກງານທີ່ເຂົາເຈົ້າເຮັດນັ້ນບໍ່ຖືກກັບຖານະເຈົ້າໜ້າທີ່ການທູດ ແລະຮຽກຮ້ອງໃຫ້ເຂົາເຈົ້າໜີອອກຈາກຣັດເຊຍກ່ອນວັນທີ 5 ເມສາປີນີ້.
ແຈ້ງການລະບຸວ່າ, ປະເທດຕົນໄດ້ຮຽກຮ້ອງໃຫ້ທ່ານ ຈອນ ຮູນສ໌ມານ ຝາກສານປະທ້ວງຂອງປະເທດຕົນກ່ຽວກັບອາເມລິກາຂັບໄລ່ເຈົ້າໜ້າທີ່ການທູດຂອງປະເທດຕົນນັ້ນໃຫ້ລັດຖະບານອາເມລິກາ ແລະທວງໃຫ້ອາເມລິກາໃຫ້ຄຳອະທິບາຍກ່ຽວກັບການບັງຄັບກວດກາແລະລະງັບຊັບສິນການຕ່າງປະເທດ 5 ແຫ່ງຂອງຣັດເຊຍຢູ່ອາເມລິກາແຕ່ປີ 2016-2017.