ວັນທີ 30 ມີນານີ້, ທ່ານວາງຢີ້ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດຈີນໄດ້ເຂົ້າຮ່ວມກອງປະຊຸມສຸດຍອດອຸດສາຫະກຳການຄ້າຂອບການຮ່ວມມືເສດຖະກິດອະນຸພາກພື້ນແມ່ນ້ຳຂອງຫຼືGMSທີ່ຈັດຂຶ້ນຢູ່ນະຄອນຫຼວງຮ່າໂນ້ຍປະເທດຫວຽດນາມ.
ທ່ານວາງຢີ້ກ່າວວ່າ: ປີນີ້ເປັນປີຄົບຮອບ 40 ປີທີ່ຈີນດຳເນີນການປະຕິຮູບແລະເປີດປະຕູສູ່ພາຍນອກ, ເປັນປີສຳຄັນໃນການສືບອັນກ່ອນຕໍ່ອັນລຸນ. ໃນໄລຍະ 40 ປີຜ່ານມາ, ຜົນສຳເລັດດ້ານການພັດທະນາຂອງຈີນແມ່ນຍາດມາໄດ້ຈາກການປະຕິຮູບແລະເປີດປະຕູສູ່ພາຍນອກ, ໃນຕໍ່ໜ້າ, ຈີນພັດທະນາຢ່າງມີຄຸນນະພາບສູງກວ່າເກົ່າກໍຍັງຕ້ອງອາໄສການປະຕິຮູບແລະເປີດປະຕູສູ່ພາຍນອກຄືເກົ່າ. ນີ້ຄືນະໂຍບາຍຂອງຈີນທີ່ກຳນົດໄວ້ແລ້ວ ເຊິ່ງຈະບໍ່ມີການປ່ຽນແປງ ແລະກໍຈະບໍ່ໄດ້ຮັບຜົນກະທົບຈາກປັດໄຈພາຍນອກເຊັ່ນກັນ. ການປະຕິຮູບແລະເປີດປະຕູສູ່ພາຍນອກສອດຄ່ອງກັບຜົນປະໂຫຍດຂອງປະຊາຊົນຈີນ ທັງຈະເຮັດໃຫ້ບັນດາປະເທດ ໄດ້ຮັບຜົນປະໂຫຍດຮ່ວມກັນ. ພວກຂ້າພະເຈົ້າຖືປີຄົບຮອບ 40 ປີຂອງການປະຕິຮູບແລະເປີດປະຕູສູ່ພາຍນອກເປັນໂອກາດ ແລະຖືການຮ່ວມກັນສ້າງ "ໜຶ່ງແລວໜຶ່ງເສັ້ນທາງ"ເປັນຈຸດໜັກ, ບໍ່ພຽງແຕ່ຈະດຶງດູດການລົງທຶນຈາກພາຍນອກເທົ່ານັ້ນ, ຍັງຈະສົ່ງເສີມການໄປລົງທຶນຢູ່ຕ່າງປະເທດອີກດ້ວຍເພື່ອສ້າງສະພາບການເປີດປະຕູຮອບດ້ານທີ່ທາງບົກແລະທາງອາກາດ,ພາຍໃນແລະຕ່າງປະເທດໃຫ້ປະສານສົມທົບກັນ,ພາກຕາເວັນອອກແລະພາກຕາເວັນຕົກຊ່ວຍຊູຍູ້ໜູນກັນ. ຈີນຈະວາງມາດຕະການຕ່າງໆເພື່ອເປີດປະຕູຕື່ມອີກ, ສ້າງສະພາບແວດລ້ອມການລົງທຶນທີ່ດີແລະສະດວກກວ່າເກົ່າໃຫ້ແກ່ວິສາຫະກິດຕ່າງປະເທດ.
ທ່ານວາງຢີ້ກ່າວເນັ້ນວ່າ: ການເປີດປະຕູຄວນແມ່ນສອງຝ່າຍເປີດປະຕູເຊິ່ງກັນແລະກັນ. ຈີນເປີດປະຕູຕໍ່ຕ່າງປະເທດ ແລະກໍຫວັງວ່າຕ່າງປະເທດກໍເປີດປະຕູຕໍ່ຈີນເຊັ່ນກັນ. ໃນການຄ້າສາກົນຫາກເກີດຄວາມຂັດແຍ້ງຈຳນວນໜຶ່ງເປັນເລື່ອງປົກກະຕິ, ສິ່ງສຳຄັນແມ່ນຄວນປຶກສາຫາລືຢ່າງສະເໝີພາບເພື່ອຊອກຫາວິທີແກ້ໄຂໃຫ້ສົມເຫດສົມຜົນແລະຖືກຕ້ອງຕາມກົດໝາຍ. ການກະທຳໃດໆທີ່ໃຊ້ມາດຕະການລັດທິຝ່າຍດຽວແລະລັດທິປົກປ້ອງການຄ້າລ້ວນແຕ່ເປັນການເຮັດໃຫ້ກົງລໍ້ປະຫວັດສາດຖອຍຫຼັງ ເຊິ່ງບໍ່ພຽງແຕ່ຈະບໍ່ມີທາງອອກເທົ່ານັ້ນ,ຫາກຍັງຈະສ້າງຜົນເສຍຫາຍໃຫ້ແກ່ຕົນເອງອີກດ້ວຍ. ທ່ານວາງຢີ້ກ່າວຕື່ມວ່າ: ຈີນຍິນດີຮ່ວມກັບບັນດາປະເທດຊົມໃຊ້ໂອກາດການພັດທະນານຳກັນ, ແຕ່ວ່າການປະຕິບັດລັດທິປົກປ້ອງກໍເທົ່າກັບວ່າປິດປະຕູຕໍ່ຈີນດ້ວຍຕົນເອງ ແລະສ້າງຜົນເສຍຫາຍໃຫ້ແກ່ຕົນເອງແນ່ນອນ. ການເວລາຈະພິສູດເລື່ອງນີ້ແລະສະພາບຄວາມເປັນຈິງກໍຈະພິສູດເລື່ອງນີ້ເຊັ່ນກັນ.
 |
