ວັນທີ 31 ມີນານີ້, ທ່ານວາງຢີ້ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດຈີນໄດ້ເຂົ້າຮ່ວມກອງປະຊຸມສຸດຍອດການຮ່ວມມືເສດຖະກິດອະນຸພາກພື້ນແມ່ນ້ຳຂອງຫຼືGMSຄັ້ງທີ6ທີ່ຈັດຂຶ້ນຢູ່ນະຄອນຫຼວງຮ່າໂນ້ຍປະເທດຫວຽດນາມ.
ທ່ານວາງຢີ້ກ່າວວ່າ: ການເປີດປະຕູສູ່ພາຍນອກເປັນເສັ້ນຊີວິດແຫ່ງການພັດທະນາຂອງອະນຸພາກພື້ນແມ່ນ້ຳຂອງ. ຜົນສຳເລັດດ້ານການພັດທະນາຂອງອະນຸພາກພື້ນແມ່ນໄດ້ມາຈາກການເປີດປະຕູ, ຖ້າຢາກຍາດເອົາການພັດທະນາຫຼາຍກວ່າເກົ່າໃນຕໍ່ໜ້າກໍຍັງຕ້ອງໄດ້ອາໄສການເປີດປະຕູຄືເກົ່າ. ພວກເຮົາຄວນສົ່ງເສີມການຄ້າແລະການລົງທຶນໃຫ້ເສລີແລະສະດວກຫຼາຍຂຶ້ນຢ່າງບໍ່ຢຸດຢັ້ງ, ສະໜັບສະໜູນໂຄງປະກອບການຄ້າຫຼາຍຝ່າຍ, ຊຸກຍູ້ເສດຖະກິດໂລກາພິວັດໃຫ້ຂະຫຍາຍຕົວໄປຕາມທິດທາງທີ່ເປີດປະຕູ,ກວມລວມ,ສ້າງຜົນປະໂຫຍດໃຫ້ຝ່າຍຕ່າງໆໂດຍທົ່ວໄປ,ສະໝ່ຳສະເໝີແລະຕ່າງຝ່າຍຕ່າງໄດ້ຮັບຜົນປະໂຫຍດນຳກັນ. ຊຸກຍູ້ການສຳເລັດການເຈລະຈາສັນຍາສາຍພົວພັນຄູ່ຮ່ວມມືເສດຖະກິດຮອບດ້ານໃນພາກພື້ນໂດຍໄວເທົ່າທີ່ຈະໄວໄດ້, ນຳພາການສ້າງລະບົບການຄ້າເສລີໃນພາກພື້ນ, ພະຍາຍາມປັບປຸງສະພາບແວດລ້ອມທຸລະກິດໃຫ້ດີຂຶ້ນ, ເຮັດໃຫ້ບຸກຄົນແລະອົງການໃນຕະຫຼາດມີການພັດທະນາຫຼາຍຂຶ້ນ, ເຮັດໃຫ້ປັດໄຈເສດຖະກິດເຄື່ອນໄຫຼຢ່າງສະດວກແລະມີປະສິດທິພາບສູງຂຶ້ນ.
ທ່ານວາງຢີ້ເນັ້ນວ່າ: ຈີນໄດ້ສົ່ງເສີມການສ້າງເສດຖະກິດໂລກແບບເປີດປະຕູມາໂດຍຕະຫຼອດ ແລະຍຶດໝັ້ນການບັນລຸໃຫ້ຕ່າງຝ່າຍຕ່າງໄດ້ຮັບຜົນປະໂຫຍດໃນການເປີດປະຕູ, ຄັດຄ້ານລັດທິປົກປ້ອງການຄ້າຢ່າງເດັດຂາດ. ການປະຕິບັດລັດທິປົກປ້ອງບໍ່ພຽງແຕ່ຈະສ້າງຜົນເສຍຫາຍໃຫ້ແກ່ຜູ້ອື່ນເທົ່ານັ້ນ ຍັງບໍ່ມີຜົນດີຕໍ່ຕົນເອງອີກດ້ວຍ, ຈະບໍ່ໄດ້ຮັບຜົນສຳເລັດຈົນເທົ່າໃດໆແລະການແກ້ໄຂຄວາດຂັດແຍ້ງດ້ານການຄ້າດ້ວຍການປຶກສາຫາລືຢ່າງສະເໝີພາບຕາມລະບຽບການສາກົນນັ້ນຈິ່ງຄືທາງເລືອກທີ່ຖືກຕ້ອງ.
 |
