ການດຳເນີນການປະຕິຮູບໃຫ້ເຖິງກົກເຖິງຮາກ ແລະ ລົງເລິກການເປີດປະຕູສູ່ພາຍນອກຢ່າງເລິກເຊິ່ງເປັນການລະລຶກທີ່ດີທີ່ສຸດຕໍ່ການປະຕິຮູບແລະການເປີດປະຕູຂອງຈີນຄົບຮອບ 40 ປີ

ວັນທີ 31 ມີນານີ້, ທ່ານ ວາງຢີ້ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດຈີນໄດ້ເຂົ້າຮ່ວມກອງປະຊຸມສຸດຍອດການຮ່ວມມືດ້ານເສດຖະກິດອະນຸພາກພື້ນແມ່ນ້ຳຂອງ ຫຼື GMS ຄັ້ງທີ 6 ທີ່ຈັດຂຶ້ນຢູ່ນະຄອນຫຼວງຮ່າໂນ້ຍປະເທດຫວຽດນາມ.

ໂອກາດດັ່ງກ່າວ, ທ່ານ ວາງຢີ້ ກ່າວວ່າ, ກອງປະຊຸມໃຫຍ່ຂອງພັກກອມມູນິດຈີນຄັ້ງທີ 19 ໄດ້ວາງແຜນການພັດທະນາຂອງຈີນ ແລະ ເປີດເສັ້ນທາງໃໝ່ແຫ່ງການສ້າງປະເທດສັງຄົມນິຍົມທີ່ທັນສະໄໝຢ່າງຮອບດ້ານ. ໝາຍຄວາມວ່າ: ການພັດທະນາຂອງຈີນໄດ້ເຂົ້າສູ່ຍຸກໃໝ່ ແລະ ຢືນຢູ່ຈຸດເລີ່ມຕົ້ນທາງປະຫວັດສາດໃໝ່ແລ້ວ. ປະເທດຈີນໃນຍຸກໃໝ່, ຈະລົງເລິກການປະຕິຮູບແລະການເປີດປະຕູສູ່ພາຍນອກຕື່ມອີກ. ການດຳເນີນການປະຕິຮູບໃຫ້ເຖິງກົກເຖິງຮາກ ແລະ ລົງເລິກການເປີດປະຕູສູ່ພາຍນອກຢ່າງເລິກເຊິ່ງນັ້ນເປັນການລະລຶກທີ່ດີທີ່ສຸດຕໍ່ການປະຕິຮູບແລະການເປີດປະຕູສູ່ພາຍນອກຂອງຈີນຄົບຮອບ 40 ປີ. ພວກຂ້າພະເຈົ້າຈະປະຕິບັດນະໂຍບາຍການຄ້າແລະການລົງທຶນແບບມີຄວາມເສລີແລະຄວາມສະດວກໃນລະດັບສູງ,ສ້າງສະພາບແວດລ້ອມການຄ້າທີ່ມີເສລີພາບແລະຄວາມທ່ຽງທຳກວ່າເກົ່າແລະຜ່ອນຄາຍນະໂຍບາຍອະນຸມັດໃຫ້ເຂົ້າຕະຫຼາດຢ່າງຫຼວງຫຼາຍ. ໃນເດືອນພະຈິກປີນີ້,ພວກເຮົາຈະຈັດງານວາງສະແດງສິນຄ້າຂາເຂົ້າສາກົນຄັ້ງທຳອິດຢູ່ກຳແພງນະຄອນຊຽງໄຮ. ນີ້ແມ່ນຕະຫຼາດໃຫຍ່ທີ່ຢູ່ໜ້າປະຕູຂອງບັນດາປະເທດ. ຍິນດີຕ້ອນຮັບບັນດາປະເທດເຂົ້າຮ່ວມຢ່າງຕັ້ງໜ້າ ເພື່ອຍາດເອົາໂອກາດ.