ຕາມຂ່າວCRI: ວັນທີ 30 ມີນານີ້, ທ່ານ ວາງຢີ້ ທີ່ປຶກສາແຫ່ງລັດທັງເປັນລັດຖະມົນຕີກະຊວງການຕ່າງປະເທດຈີນໄດ້ກ່າວປາໄສໃນໂອກາດເຂົ້າຮ່ວມກອງປະຊຸມສຸດຍອດອຸດສາຫະກຳການຄ້າການຮ່ວມມືດ້ານເສດຖະກິດອະນຸພາກພື້ນແມ່ນ້ຳຂອງຫຼື GMS ທີ່ຈັດຂຶ້ນຢູ່ນະຄອນຫຼວງຮ່າໂນ່ຍປະເທດຫວຽດນາມ.
ທ່ານ ວາງຢີ້ ກ່າວວ່າ, ປັດຈຸບັນ, ສະຖານະການສາກົນແລະເສດຖະກິດໂລກພວມເກີດການປ່ຽນແປງຢ່າງເລິກເຊິ່ງ, ການພັດທະນາຂອງອະນຸພາກພື້ນແມ່ນ້ຳຂອງກໍ່ໄດ້ຜະເຊີນກັບໂອກາດການພັດທະນາ. ຂ້າພະເຈົ້າຂໍຖືໂອກາດນີ້ສົ່ງຂໍ້ມູນຂ່າວສານ 3 ຂໍ້ຕໍ່ເພື່ອນມິດທັງຫຼາຍໃນວົງການອຸດສາຫະກຳການຄ້າຄື:
ທີໜຶ່ງ, ການພັດທະນາຂອງຈີນໄດ້ເຂົ້າສູ່ຍຸກໃໝ່,ຈະສືບຕໍ່ສະໜອງພະລັງແຮງທີ່ເຂັ້ມແຂງໃຫ້ແກ່ການພັດທະນາຂອງປະເທດອະນຸພາກພື້ນກໍ່ຄືຂອງໂລກ. ພວກຂ້າພະເຈົ້າຈະຍຶດໝັ້ນທັດສະນະຄະຕິໃໝ່ທີ່ມີການປະດິດສ້າງໃໝ່,ການປະສານງານ,ສີຂຽວ,ການເປີດປະຕູ,ແລະການຊົມໃຊ້ຮ່ວມກັນ,ຊຸກຍູ້ເສດຖະກິດຈີນໃຫ້ພັດທະນາຢ່າງມີຄຸນນະພາບສູງຢ່າງວ່ອງໄວ.
ອັນທີສອງ,ຈີນຈະເປີດກວ້າງການເປີດປະຕູ່ສູ່ພາຍນອກຕື່ມອີກ,ເພື່ອສ້າງໂອກາດໃຫ້ແກ່ປະເທດຢູ່ອະນຸພາກພື້ນກໍ່ຄືທົ່ວໂລກໃຫ້ຫຼາຍກວ່າເກົ່າ. ປະຕູຂອງຈີນບໍ່ປິດຈັກເທື່ອ,ແລະຈະນັບມື້ນັບເປີດກວ້າງອອກ.ພວກຂ້າພະເຈົ້າຈະປະຕິບັດນະໂຍບາຍການຄ້າແລະການລົງທຶນແບບມີຄວາມເສລີແລະຄວາມສະດວກໃນລະດັບສູງ,ຜ່ອນຄາຍນະໂຍບາຍອະນຸມັດໃຫ້ເຂົ້າຕະຫຼາດຢ່າງຫຼວງຫຼາຍ,ເປີດກວ້າງການເປີດປະຕູສູ່ພາຍນອກຂອງຂະແໜງການບໍລິການໂດຍສະເພາະແມ່ນຂະແໜງການທະນາຄານ,ປົກປ້ອງສິດແລະຜົນປະໂຫຍດທີ່ຊອບດ້ວຍກົດໝາຍຂອງນັກລົງທຶນຕ່າງປະເທດ,ປົກປ້ອງຊັບສິນທາງປັນຍາ,ແລະສ້າງສະພາບແວດລ້ອມດ້ານການຄ້າ ສາກົນລະດັບໜຶ່ງ.
ແລະອັນສຸດທ້າຍ, ຈີນຈະສືບຕໍ່ຊຸກຍູ້ການພັດທະນາຮ່ວມກັນຂອງປະເທດຢູ່ອະນຸພາກພື້ນຢ່າງເດັດດ່ຽວໜຽວແໜ້ນ. ໃນຖານະເປັນສະມາຊິກທີ່ສຳຄັນຂອງອະນຸພາກພື້ນ,ການພັດທະນາຂອງຈີນໄດ້ມີສ່ວນກ່ຽວພັນກັບການພັດທະນາຂອງບັນດາປະເທດ,ມີຊາຕາກຳຮ່ວມກັນ.ການພັດທະນາຂອງຈີນອາໄສປະເທດຢູ່ອ້ອມຂ້າງ ເຊິ່ງຜົນປະໂຫຍດທີ່ໄດ້ຮັບນັ້ນກໍ່ຈະນຳເອົາມາໃຫ້ແກ່ປະເທດອ້ອມຂ້າງກ່ອນ, ປະເທດອ້ອມຂ້າງກໍ່ຈະໄດ້ຮັບຜົນກຳໄລຈາກການເປີດປະຕູຂອງຈີນ.ຈີນຈະລົງເລິກການພົວພັນກັບປະເທດຢູ່ອະນຸພາກພື້ນໂດຍຕາມທັດສະນະຄະຕິທີ່ສະໜິດສະໜົມກັນ, ຈິງໃຈຕໍ່ກັນ, ໃຫ້ບຸລິມະສິດແກ່ກັນ, ກວມລວມ ແລະທິດທາງຖານບ້ານໃກ້ເຮືອນຄຽງທີ່ດີແລະເປັນເພື່ອນມິດທີ່ດີ, ເສີມຂະຫຍາຍຈິດໃຈໝູ່ຄູ່,ລົງເລິກຄວາມໄວ້ເນື້ອເຊື່ອໃຈກັນທາງການເມືອງແລະການຮ່ວມມືທີ່ແທ້ຈິງ,ຮ່ວມກັນຊຸກຍູ້ການພັດທະນາຂອງພາກພື້ນນີ້ແລະສ້າງຄວາມສົມບູນພູນສຸກໃຫ້ແກ່ປະຊາຊົນ. ຍິນດີຕ້ອນຮັບປະເທດຢູ່ອະນຸພາກພື້ນຂີ່ລົດໄວແຫ່ງການພັດທະນາຂອງຈີນ,ຊຸກຍູ້ອະນຸພາກພື້ນໃຫ້ໄດ້ຮັບການພັດທະນາຢ່າງວ່ອງໄວແລະໝັ້ນທ່ຽງ.
 |
