ວັນທີ 31 ມີນາຜ່ານມາ, ທ່ານຫວາງຢີ້, ທີ່ປຶກສາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດຈີນໄດ້ເຂົ້າຢ້ຽມຂ່ຳນັບທ່ານທອງລຸນ ສີສຸລິດ ນາຍົກລັດຖະມົນຕີລາວຢູ່ນະຄອນຫຼວງຮ່າໂນ້ຍປະເທດຫວຽດນາມ.
ທ່ານຫວາງຢີ້ໄດ້ຝາກຄວາມຢ້ຽມຢາມຖາມຂ່າວຂອງທ່ານຫຼີເຄີ້ສຽງ ນາຍົກລັດຖະມົນຕີຈີນໄປຍັງທ່ານທອງລຸນ ສີສຸລິດ. ທ່ານຫວາງຢີ້ຍັງໄດ້ແຈ້ງຜົນງານສຳຄັນຂອງກອງປະຊຸມສອງສະພາຈີນໃຫ້ຊາບ ແລະກ່າວວ່າ ພາຍຫຼັງກອງປະຊຸມໃຫຍ່ຄັ້ງທີ 19 ຂອງພັກກອມມູນິດຈີນຈັດຂຶ້ນຢ່າງສຳເລັດຜົນແລ້ວ, ການໄປຢ້ຽມຢາມຕ່າງປະເທດຄັ້ງທຳອິດຂອງສະຫາຍເລຂາທິການໃຫຍ່ສີຈິ້ນຜິງກໍໄດ້ໄປຢ້ຽມຢາມປະເທດລາວ ເຊິ່ງສະແດງໃຫ້ເຫັນເຖິງຖານະສຳຄັນພິເສດຂອງປະເທດລາວໃນສາຍພົວພັນທາງການທູດຂອງຈີນກັບປະເທດອ້ອມຂ້າງ. ຜູ້ນຳສອງພັກ ສອງລັດໄດ້ບັນລຸຄວາມເຫັນເປັນເອກະພາບກັນທີ່ສຳຄັນກ່ຽວກັບການສ້າງຄູ່ຮ່ວມຊາຕາກຳຈີນ-ລາວທີ່ມີຄວາມໝາຍຍຸດທະສາດ ເຊິ່ງໄດ້ຊີ້ແຈງທິດທາງໃຫ້ແກ່ການຂະຫຍາຍສາຍພົວພັນສອງປະເທດໃນອະນາຄົດ. ສອງຝ່ອຍຈະກຳແໜ້ນສາຍຫຼັກ ຄືໝາກຜົນແຫ່ງການຢ້ຽມຢາມປະເທດລາວຂອງທ່ານສີຈິ້ນຜິງ, ວາງແຜນ ແລະປະຕິບັດການໄປມາຫາສູ່ກັນລະຫວ່າງການນຳຂັ້ນສູງໃຫ້ດີ, ຊຸກຍູ້ການຮ່ວມມືຕົວຈິງຢ່າງຮອບດ້ານ, ຈັດຕັ້ງປະຕິບັດຄູ່ຮ່ວມຊາຕາກຳໃຫ້ເປັນຮູບເປັນຮ່າງຂຶ້ນ. ທາງລົດໄຟຈີນລາວເປັນໂຄງການສັນຍະລັກໃນການຮ່ວມມືລະຫວ່າງສອງປະເທດ, ກໍແມ່ນຜົນງານຕົວຈິງທີ່ຈີນກັບປະເທດອ້ອມຂ້າງເຊື່ອມຈອດທາງຍຸດທະສາດການພັດທະນາພາຍໃຕ້ຂອບ "ໜຶ່ງແລວໜຶ່ງເສັ້ນທາງ", ຫວັງວ່າສອງຝ່າຍເພີ່ມທະວີການປະສານສົມທົບກັນ ເພື່ອຮັບປະກັນໃຫ້ໂຄງການດັ່ງກ່າວໄດ້ຮັບຄວາມຄືບໜ້າຢ່າງສະດວກ.
ທ່ານຫວາງຢີ້ກ່າວຕື່ມວ່າ, ຈີນ ແລະລາວເປັນປະທານຮ່ວມຂອງຂອບ "ການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ", ຈີນຍິນດີຮ່ວມກັບຝ່າຍລາວເພີ່ມທະວີການປະສານສົມທົບກັນ, ຊຸກຍູ້ໃຫ້ການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງພັດທະນາໄດ້ດີກວ່າເກົ່າ. ລາວເປັນປະເທດສະມາຊິກສຳຄັນຂອງອາຊຽນ, ເຊື່ອໝັ້ນວ່າລາວຈະສືບຕໍ່ເສີມຂະຫຍາຍບົດບາດອັນຕັ້ງໜ້າໃນຂະບວນການຂະຫຍາຍສາຍພົວພັນຈີນ-ອາຊຽນ.
ທ່ານທອງລຸນ ສີສຸລິດຕາງໜ້າພັກ ລັດຖະບານ ແລະປະຊາຊົນລາວສະແດງຄວາມຊົມເຊີຍຢ່າງສຸດໃຈອີກຄັ້ງໜຶ່ງຕໍ່ການຈັດກອງປະຊຸມໃຫຍ່ຄັ້ງທີ 19 ຂອງພັກກອມມູນິດຈີນ ກໍຄືກອງປະຊຸມສອງສະພາຈີນຢ່າງສຳເລັດຜົນ ໂດຍກ່າວວ່າ ເຊື່ອໝັ້ນວ່າພາຍໃຕ້ການນຳພາຂອງສູນກາງພັກກອມມູນິດຈີນທີ່ມີສະຫາຍສີຈິ້ນຜິງເປັນແກນກາງນັ້ນ, ພາລະກິດສ້າງສາສັງຄົມນິຍົມທີ່ມີສີສັນພິເສດຂອງຈີນຍ່ອມຈະໄດ້ຮັບຜົນສຳເລັດຫຼາຍກວ່າເກົ່າຢ່າງບໍ່ຢຸດຢັ້ງ, ສາຍພົວພັນຄູ່ຮ່ວມມືຍຸດທະສາດຮອບດ້ານລະຫວ່າງລາວກັບຈີນກໍຈະກ້າວຂຶ້ນສູ່ລະດັບສູງກວ່າເກົ່າເລື້ອຍໆ. ນັບແຕ່ປີກາຍນີ້ເປັນຕົ້ນມາ, ການຮ່ວມມືຕົວຈິງລະຫວ່າງສອງປະເທດໄດ້ຮັບຜົນສຳເລັດທີ່ສຳຄັນ ໂດຍສະເພາະແມ່ນໂຄງການກໍ່ສ້າງທາງລົດໄຟລາວຈີນໄດ້ຮັບຄວາມຄືບໜ້າຢ່າງສະດວກ, ປະຊາຊົນລາວໄດ້ຮັບຜົນປະໂຫຍດຈາກການສ້າງ "ໜຶ່ງແລວໜຶ່ງເສັ້ນທາງ"ຮ່ວມກັນ. ຝ່າຍລາວຫວັງຢາກຮັກສາການໄປມາຫາສູ່ກັນລະຫວ່າງການນຳຂັ້ນສູງກັບຝ່າຍຈີນຢ່າງໃກ້ຊິດ, ສືບຕໍ່ຊຸກຍູ້ການຮ່ວມມືຕົວຈິງໃນຂົງເຂດເຊື່ອມຈອດກັນ. ຝ່າຍລາວດີໃຈທີ່ຮ່ວມກັບຝ່າຍຈີນເປັນປະທານຮ່ວມຂອງການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ, ຍິນດີປະສານສົມທົບກັບຝ່າຍຈີນຢ່າງໃກ້ຊິດ, ຊຸກຍູ້ການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງໃຫ້ໄດ້ຮັບຜົນສຳເລັດຫຼາຍກວ່າເກົ່າ, ທັງຊຸກຍູ້ສາຍພົວພັນຈີນ-ອາຊຽນໃຫ້ຂະຫຍາຍຕົວຢ່າງໜັກແໜ້ນ ແລະ ປອດໃສ.
