ລົດໄຟຄວາມໄວສູງປັກກິ່ງ- ສົງອ່ານໄດ້ຂົນສົ່ງຜູ້ໂດຍສານເຖິງ 5 ແສນເທື່ອຄົນ
ວັນທີ 1 ເມສານີ້ເປັນວັນ ຄົບຮອບ 1 ປີທີ່ຈີນສະເໜີສ້າງຕັ້ງເມືອງໃໝ່ສົງອ່ານຢູ່ແຂວງເຫີເປີຍ. ເລີ່ມແຕ່ເປີດນຳໃຊ້ຂະບວນລົດໄຟຄວາມໄວສູງ 2 ຄູ່ຈາກນະຄອນຫຼວງປັກກິ່ງຮອດເມືອງປາວຕິ້ງໂດຍຜ່ານເມືອງໃໝ່ຊົງອ່ານໃນເດືອນກໍລະກົດປີກາຍນີ້ເປັນຕົ້ນມາ, ໄດ້ປາກົດມີກະແສຜູ້ໂດຍສານປະຈຳລະຫວ່າງນະຄອນຫຼວງປັກກິ່ງກັບເມືອງໃໝ່ສົງອ່ານເພື່ອຢ້ຽມຢາມຍາດພີ່ນ້ອງ, ເຮັດວຽກ, ດຳເນີນທຸລະກິດ ແລະທ່ອງທ່ຽວ.
ມາຮອດວັນທີ 30 ມີນາຜ່ານມາ, ຂະບວນລົດໄຟຄວາມໄວສູງ 2 ຄູ່ລະຫວ່າງປັກກິ່ງ-ສົງອ່ານໄດ້ຂົນສົ່ງຜູ້ໂດຍສານປະມານ 4ແສນ 9 ໝື່ນເທື່ອຄົນ.
ໃນທ້າຍເດືອນກຸມພາປີນີ້, ທາງລົດໄຟລະຫວ່າງນະຄອນຫຼວງປັກກິ່ງຮອດເມືອງສົງອ່ານແຂວງເຫີເປີຍໄດ້ລົງມືກໍ່ສ້າງຢ່າງເປັນທາງການ. ເຊິ່ງໂຄງການດັ່ງກ່າວເປັນໂຄງການຄົມມະນາຄົມຂະໜາດໃຫຍ່ທຳອິດໃນການກໍ່ສ້າງເມືອງໃໝ່ສົງອ່ານ, ຫຼັງຈາກສ້າງສຳເລັດແລ້ວຂີ່ລົດໄຟຈາກນະຄອນຫຼວງປັກກິ່ງໄປເມືອງໃໝ່ສົງອ່ານຈະໃຊ້ເວລາພຽງແຕ່ 30 ນາທີເທົ່ານັ້ນ. ທາງລົດໄຟທີ່ອອກແບບຄວາມໄວ 250 ກິໂລແມັດຕໍ່ຊົ່ວໂມງສາຍນີ້ຈະເປີດບໍລິການໃນເວລາດຽວກັນກັບສະໜາມບິນແຫ່ງໃໝ່ໃນເດືອນກັນຍາປີ 2019.