ວັນທີ 1 ເມສານີ້, ທ່ານວາງຢີ້ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດຈີນທີ່ກຳລັງຢ້ຽມຢາມຫວຽດນາມຢ່າງເປັນທາງການໄດ້ພົບປະຫາລືກັບທ່ານຟາມບິງມິງ ຮອງນາຍົກລັດຖະມົນຕີທັງເປັນລັດຖະມົນຕີກະຊວງການຕ່າງປະເທດຫວຽດນາມ.
ທ່ານວາງຢີ້ຢືນຢັນວ່າ: ພັກແລະລັດຖະບານຈີນໃຫ້ຄວາມສຳຄັນສູງຕໍ່ການພົວພັນຈີນ-ຫວຽດນາມ. ປັດຈຸບັນ, ການພົວພັນຈີນ-ຫວຽດນາມມີທ່ວງທ່າຂະຫຍາຍຕົວເປັນຢ່າງດີ. ພາຍໃຕ້ການນຳຈາກຍຸດທະສາດຂອງການນຳຂັ້ນສູງສອງພັກສອງລັດ, ການຮ່ວມມືສອງຝ່າຍໄດ້ບັນລຸການພັດທະນາແບບກ້າວກະໂດດ. ສອງຝ່າຍຄວນວາງແຜນການໄປມາຫາສູ່ກັນລະຫວ່າງການນຳຂັ້ນສູງ, ເພີ່ມທະວີການແລກປ່ຽນກັນລະຫວ່າງພັກ,ວຽກງານປ້ອງກັນຊາດ,ການປະຕິບັດກົດໝາຍແລະລະຫວ່າງທ້ອງຖິ່ນ. ເລັ່ງລັດການເຊື່ອມຕໍ່ຢ່າງຕິດແທດຕົວຈິງລະຫວ່າງຂໍ້ລິເລີ່ມ "ໜຶ່ງແລວໜຶ່ງເສັ້ນທາງ"ກັບ "ສອງແລວໜຶ່ງວົງ"ຄືແລວເສດຖະກິດຄຸນມິງ-ຮ່າໂນ້ຍ,ແລວເສດຖະກິດນານນິງ-ຮ່າໂນ້ຍ,ວົງເສດຖະກິດອ່າວເປີຍປູ້, ຊຸກຍູ້ການປະຕິບັດໂຄງການສຳຄັນຕ່າງໆເປັນຕົ້ນພື້ນຖານໂຄງລ່າງ,ກຳລັງການຜະລິດ,ເຂດຮ່ວມມືເສດຖະກິດຂ້າມຊາດແລະອື່ນໆໃຫ້ໄດ້ຮັບປະສິດທິຜົນທີ່ດີ. ຮັດແໜ້ນການແລກປ່ຽນດ້ານວັດທະນະທຳມະນຸດລະຫວ່າງສອງຊາດ, ຄວບຄຸມຄວາມຂັດແຍ້ງໃຫ້ເໝາະສົມ, ເພີ່ມພື້ນຖານປະຊາມະຕິແຫ່ງການພົວພັນສອງຝ່າຍໃຫ້ແໜ້ນແຟ້ນຂຶ້ນຕື່ມ.
ທ່ານຟາມບິງມິງຊົມເຊີຍຢ່າງສຸດໃຈຕໍ່ຈີນທີ່ໄດ້ປະສົບຜົນສຳເລັດໃນການຈັດກອງປະຊຸມສອງສະພາ ທັງສະແດງຄວາມຂອບໃຈຕໍ່ຈີນທີ່ໄດ້ສະໜັບສະໜູນຫວຽດນາມເປັນເຈົ້າພາບຈັດກອງປະຊຸມສຸດຍອດການຮ່ວມມືເສດຖະກິດອະນຸພາກພື້ນແມ່ນ້ຳຂອງ. ຫວຽດນາມຍິນດີປະສານສົມທົບກັບຈີນຢ່າງໃກ້ຊິດ, ຊຸກຍູ້ການຮ່ວມມືທີ່ຕິດແທ້ຕົວຈິງໃນບັນດາຂົງເຂດແລະການແລກປ່ຽນດ້ານວັດທະນະທຳໃຫ້ໄດ້ຮັບປະສິດທິຜົນຢ່າງບໍ່ຢຸດຢັ້ງ, ຊຸກຍູ້ການພົວພັນມິດຕະພາບແລະການຮ່ວມມືຫວຽດນາມ-ຈີນໃຫ້ຂະຫຍາຍຕົວແລະປະສົບຜົນສຳເລັດໃໝ່ໃຫຍ່ຫຼວງກວ່າເກົ່າ.
 |
