ຫຼັງໄດ້ຮັບການອະນຸມັດຈາກລັດຖະບານຈີນ, ຄະນະກຳມະການກົດລະບຽບພາສີຂອງລັດຖະບານ ໄດ້ຕັດສິນວ່າ ນັບແຕ່ວັນທີ 2 ເມສານີ້ເປັນຕົ້ນໄປ, ຈະຢຸດຕິການຫຼຸດພາສີໃຫ້ແກ່ສິນຄ້ານຳເຂົ້າທີ່ຜະລິດຢູ່ອາເມລິກາ 128 ຊະນິດໃນ 7 ປະເພດ ແລະຂຶ້ນພາສີຕື່ມບົນພື້ນຖານອັດຕາພາສີທີ່ກຳນົດໃຊ້ໃນປັດຈຸບັນ, ຍົກອັດຕາພາສີຂຶ້ນ 15% ຕໍ່ສິນຄ້ານຳເຂົ້າ 120 ຊະນິດ ເປັນຕົ້ນໝາກໄມ້ແລະຜະລິດຕະພັນທີ່ກ່ຽວຂ້ອງ ຍົກອັດຕາພາສີຂຶ້ນ 25% ຕໍ່ສິນຄ້ານຳເຂົ້າ 8 ຊະນິດ ເຊັ່ນຊີ້ນໝູພ້ອມຜະລິດຕະພັນທີ່ກ່ຽວຂ້ອງ. ຂະນະທີ່ນະໂຍບາຍສະຫງວນພາສີ, ຫຼຸດພາສີ ແລະ ປອດພາສີນັ້ນບໍ່ມີການປ່ຽນແປງ.
ວັນທີ 8 ມີນາຜ່ານມາ, ທ່ານໂດນັນ ທຣຳ ປະທານາທິບໍດີອາເມລິກາໄດ້ລົງນາມໃນບົດຖະແຫຼງຂ່າວ ໂດຍເຫັນວ່າການນຳເຂົ້າຜະລິດຕະພັນເຫຼັກກ້າ ແລະ ອາລູມີນຽມ ມີຜົນກະທົບທີ່ເປັນໄພຂົ່ມຂູ່ຕໍ່ຄວາມປອດໄພຂອງອາເມລິກາ ແລະຕົກລົງວ່າ ຈະຂຶ້ນພາສີຕື່ມຕໍ່ການນຳເຂົ້າຜະລິດຕະພັນສອງຊະນິດດັ່ງກ່າວ ນັບແຕ່ວັນທີ 23 ເດືອນດຽວກັນເປັນຕົ້ນໄປ(ຖືກເອີ້ນວ່າ ມາດຕະການ 232).
ເຈົ້າໜ້າທີ່ກົມພາສີ ກະຊວງການເງິນຈີນ ກ່າວວ່າ: ມາດຕະການ 232 ໄດ້ຝືນກັບກົດລະບຽບທີ່ກ່ຽວຂ້ອງຂອງອົງການການຄ້າໂລກ. ຂະນະທີ່ຈີນສົ່ງເສີມ ແລະ ສະໜັບສະໜູນໂຄງປະກອບການຄ້າຫຼາຍຝ່າຍ ແລະການຢຸດຕິການຫຼຸດພາສີໃຫ້ແກ່ສິນຄ້າທີ່ຜະລິດຢູ່ອາເມລິການັ້ນ ແມ່ນປະຕິບັດໂດຍມີກົດລະບຽບຂອງອົງການການຄ້າໂລກເປັນສິ່ງອ້າງອີງ ແລະເປັນມາດຕະການທີ່ຊອບທຳຂອງຈີນໃນການປົກປັກຮັກສາຜົນປະໂຫຍດຂອງປະເທດຕົນ.
