ພາຍຫຼັງໄດ້ເດີນເຮືອຕາມລຳແມ່ນ້ຳລ້ານຊ້າງ-ແມ່ນ້ຳຂອງເປັນເວລາ 2 ວັນແລ້ວ, ຊີ້ນໄກ່ແຊ່ແຂງ 150 ໂຕນຈາກປະເທດໄທໄດ້ສົ່ງໄປເຖິງດ່ານກ່ວນເຫຼີຍເມືອງຊຽງຮຸ່ງກິ່ງແຂວງສິບສອງພັ່ນນາແຂວງຢຸນນານຈີນ ແລະ ຜ່ານດ່ານພາສີແລ້ວນຳເຂົ້າຈີນ ເຊິ່ງເປັນຂີດໝາຍສະແດງໃຫ້ເຫັນວ່າ, ດ່ານນຳເຂົ້າປະເພດຊີ້ນສະເພາະແຫ່ງທຳອິດຢູ່ຊາຍແດນຈີນ-ມຽນມາໄດ້ເປີດນຳໃຊ້ຢ່າງເປັນທາງການແລ້ວ.
ທ່ານອ້າຍລາ ເຈົ້າເມືອງເມືອງຫຼ້າ ທັງເປັນຮອງຫົວໜ້າຄະນະກຳມາທິການຄຸ້ມຄອງເຂດທົດລອງການພັດທະນາ ແລະ ການເປີດປະຕູບໍ່ຫານເປີດເຜີຍວ່າ, ໂຄງການດ່ານນຳເຂົ້າປະເພດຊີ້ນສະເພາະເປັນໜຶ່ງໃນໂຄງການສຳຄັນໃນເຂດທົດລອງການພັດທະນາ ແລະ ເປີດປະຕູທີ່ສຳຄັນຂອງຈີນ, ອາດສາມາດເສີມຂະຫຍາຍທ່າແຮງລຳແມ່ນ້ຳລ້ານຊ້າງ-ແມ່ນ້ຳຂອງ ທີ່ເປັນລຳແມ່ນ້ຳສາກົນຢ່າງເຕັມທີ່ ແລະ ສອດຄ່ອງກັບຄວາມຕ້ອງການດ້ານການຮ່ວມມືທາງເສດຖະກິດການຄ້າທີ່ນັບມື້ເພີ່ມຂຶ້ນລະຫວ່າງຈີນ, ລາວ, ມຽນມາ ແລະ ໄທ. ດ່ານກ່ວນເຫຼີຍຈະກຳໂອກາດດັ່ງກ່າວ ເພື່ອຍົກລະດັບການບໍລິການຂອງດ່ານໃຫ້ສູງຂຶ້ນ ແລະ ອອກແຮງພັດທະນາເສດຖະກິດທ່າກຳປັ່ນສາກົນ.
ຂ່າວແຈ້ງຕື່ມວ່າ, ຕາມການຄາດຄະເນແລ້ວ, ແຕ່ລະປີ, ດ່ານນຳເຂົ້າປະເພດຊີ້ນສະເພາະກ່ວນເຫຼີຍເມືອງຊຽງຮຸ່ງຈະສາມາດນຳເຂົ້າຊີ້ນສັດປະເພດຕ່າງໆໄດ້ເຖິງ 1 ແສນ 5 ໝື່ນໂຕນ.
 |
