ປະທານປະເທດຈີນຈະເຂົ້າຮ່ວມພິທີເປີດກອງປະຊຸມເວທີປຶກສາຫາລືອາຊີໂປອາວ 2018
2018-04-03 14:44:27 cri
ທ່ານຫວາງຢີ້ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດຈີນ ຢືນຢັນໃນພິທີຖະແຫຼງຂ່າວຕໍ່ນັກຂ່າວຈີນແລະຕ່າງປະເທດໃນວັນທີ 3 ເມສານີ້ວ່າ: ທ່ານສີຈິ້ນຜິງ ປະທານປະເທດຈີນ ຈະເຂົ້າຮ່ວມພິທີເປີດກອງປະຊຸມເວທີປຶກສາຫາລືອາຊີໂປອາວ 2018 ຕາມຄຳເຊີນ ແລະຈະກ່າວປາໄສສຳຄັນ, ພົບປະກັບປະມຸກລັດ, ຫົວໜ້າລັດຖະບານປະເທດຕ່າງໆ ແລະເຈົ້າໜ້າທີ່ອົງການຈັດຕັ້ງສາກົນທີ່ເຂົ້າຮ່ວມກອງປະຊຸມ, ພົບປະກັບຄະນະມົນຕີຂອງເວທີປຶກສາຫາລື ທັງສົນທະນາກັບຜູ້ຕາງໜ້ານັກທຸລະກິດຈີນແລະຕ່າງປະເທດທີ່ເຂົ້າຮ່ວມກອງປະຊຸມ. ນີ້ແມ່ນເທື່ອທີ 3 ທີ່ທ່ານສີຈິ້ນຜິງ ເຂົ້າຮ່ວມກອງປະຊຸມເວທີປຶກສາຫາລືອາຊີໂປອາວປະຈຳປີ ໃນຖານະເປັນປະທານປະເທດຈີນ ເຊິ່ງສະແດງໃຫ້ເຫັນຢ່າງເຕັມທີ່ວ່າ ທ່ານປະທານສີຈິ້ນຜິງ ແລະ ລັດຖະບານຈີນໃຫ້ຄວາມສຳຄັນສູງຕໍ່ເວທີປຶກສາຫາລືດັ່ງກ່າວ ທັງໃຫ້ການສະໜັບສະໜູນຢ່າງແຂງແຮງ.
